Shaktipeeth Highway : ‘शक्तिपीठ’रच्या रेखांकनाला येऊ नये

Sangli News : ‘‘आमचा उदरनिर्वाह पूर्णपणे शेतीवर अवलंबून आहे. शेतकरी अल्पभूधारक असून ते भूमिहीन होत आहेत. त्यामुळे ‘शक्तिपीठ’ महामार्गास आमचा पूर्णपणे विरोध आहे. तेव्हा, रेखांकनाला येऊ नये; अन्यथा प्रतिकार करण्यात येईल,’’ असा पवित्रा शनिवारी (ता. २४) सांगलीवाडीतील शेतकऱ्यांनी घेतला.

पवनार ते पत्रादेवी शक्तिपीठ द्रुतगती महामार्ग जाणाऱ्या गावातील बाधित शेतकऱ्यांची बैठक घेऊन त्यांच्याशी प्रशासनातर्फे संवाद साधण्यात येत आहे. या समितीने सायंकाळी मिरज तालुक्यातील सांगलीवाडीतील बाधित शेतकऱ्यांची बैठक घेतली.

यासह आज मिरज तालुक्यातील बुधगाव, कर्नाळ, पद्माळे या गावांतील ‘शक्तिपीठ’ बाधित शेतकऱ्यांचीही बैठक घेण्यात आली. त्यावेळी बचाव कृती समितीच्या सदस्यांनी समन्वयकांवर प्रश्नांची सरबत्ती केली. सर्वच ठिकाणी या समितीला विरोध करण्यात आला. शक्तिपीठ महामार्गाला आपला विरोध असल्याचे उपस्थित शेतकऱ्यांनी त्यांना स्पष्टपणे सांगितले.

या महामार्गामुळे बाधित होणाऱ्या शेतकऱ्यांच्या समस्या, अडचणी यांचे निराकरण करण्यासाठी मिरज उपविभागीय अधिकाऱ्यांनी योजनादूत समिती स्थापन करुन रेखांकनाबाबत त्यांची बैठक घेण्यात येत आहे. सांगलीवाडी विकास सोसायटीच्या सभागृहात झालेल्या या बैठकीस कसबे डिग्रजचे मंडल अधिकारी तानाजी यादव, सांगलीवाडीचे तलाठी शिवाजी चव्हाण, राम पवार, सुधाकर कुंभोजे हे सदस्य उपस्थित होते.

महामार्गाने बाधित होणाऱ्या शेतकऱ्यांनी शासनाकडे तक्रार केली आहे. त्यावर सुनावणी झाली मात्र त्याचा निकाल झाला नाही. मग रेखांकनास कसे आला, असा प्रश्न या वेळी केला. सुनावणीचे उत्तर मिळाले नाही, याचे उत्तर आधी मिळाले पाहिजे. तसेच शक्तिपीठ महामार्गासाठी सांगलीवाडीतील एकही जमीनदेणार नाही.

आलाच तर प्रतिकार करण्यात येईल

आमदार, खासदार, मुख्यमंत्री, उपमुख्यमंत्र्यांना निवेदन दिले आहे. गेले दीड वर्ष आम्ही आंदोलन करत आहोत. मात्र सुनावणीचे उत्तर देत नाहीत, शेतकऱ्यांची चेष्टा सुरू केली आहे का, असा सवाल शेतकऱ्यांनी केला. आम्ही अल्पभूधारक शेतकरी आहोत. आमचा उदरनिर्वाह पुर्णपणे शेतीवर आहे. त्यामुळे ‘शक्तिपीठ’ला आमचा पूर्णपणे विरोध आहे. रेखांकनाला येऊ नये; आलाच तर प्रतिकार करण्यात येईल, असा इशारा शेतकऱ्यांनी दिला.