Onion Season : रांगडा हंगामात कांदा उत्तम पर्यायी पीक

Washim News : जिल्ह्यात यंदाच्या हंगामात अतिवृष्टीमुळे सोयाबीन पिकाचे मोठ्या प्रमाणावर नुकसान झाले आहे. अनेक गावांमध्ये पेरणीनंतर उगवण न झाल्यामुळे आणि मशागतीचे काम वेळेत न झाल्यामुळे दुबार पेरणी करणेही अशक्य झाले.

परिणामी, कांदा पिकाची लागवड पर्यायाची शेतकरी चाचपणी करीत आहेत. त्याअनुषंगाने मंगरूळपीर तालुक्यातील पिंपरी अवगण येथे पर्यायी पिकांवर चर्चासत्र घेण्यात आले.

‘रांगडा हंगामातील कांदा उत्पादन तंत्र’ या विषयावर करडा कृषी विज्ञान केंद्राचे उद्यानविद्या तज्ज्ञ निवृत्ती पाटील यांनी मार्गदर्शन केले. कार्यक्रमाला प्रमुख पाहुणे म्हणून विजय गंगाराम अवगण आणि बाळकृष्ण अवगण हे उपस्थित होते.

श्री. पाटील म्हणाले, की या परिसरातील हलक्या ते मध्यम जमिनींमध्ये पाण्याचा उत्तम निचरा होत असल्याने लेट खरीप हंगामातील रांगडा कांदा हे चार ते साडेचार महिन्यांत शंभर ते सव्वाशे क्विंटल उत्पादन देणारे एक फायदेशीर पीक ठरू शकते.

विदर्भामध्ये पिकवला जाणारा उन्हाळी कांदा सप्टेंबर-ऑक्टोबर महिन्याच्या आसपास बाजारातून संपतो आणि याच दरम्यान कांद्याचे दर वाढण्यास सुरुवात होते. अहिल्यानगर, नाशिक व सोलापूर येथील खरीप व लेट खरीप कांदा या काळात बाजारात येतो आणि चांगले दर मिळवतो. वाशीम जिल्ह्यात सुद्धा अशा प्रकारच्या कांदा उत्पादनासाठी मोठी संधी आहे, असे त्यांनी स्पष्ट केले.

भीमा सुपर, भीम रेड आणि भीमा शुभ्रा या शिफारशीत वाणांची रुंद वरंबा सरी पद्धतीने थेट पेरणी केल्यास चार ते साडेचार महिन्यांत पीक तयार होते, अशी माहिती देताना त्यांनी अन्नद्रव्य व्यवस्थापन, कीड व रोग नियंत्रण यावरही सविस्तर मार्गदर्शन केले. या चर्चासत्रानंतर गावातील शेतकऱ्यांनी मिळून चाळीस ते पन्नास एकर क्षेत्रावर रांगडा कांदा उत्पादन घेण्याचा निर्णय घेतला.

सूत्रसंचालन सचिन महादेव अवगण यांनी केले. तर गणेश सुखदेव बुरे यांनी आभार मानले. कार्यक्रमासाठी पांडुरंग आत्माराम ठाकरे, गणेश बाबराव अवगण, गजानन काशीराम अवगण यांच्यासह इतरांनी पुढाकार घेतला.