Farmland Leasing Trend : जव्हारमध्ये शेती बटाईच्या प्रमाणात वाढ

Palghar News : थंड हवेचे ठिकाण, उंचावर वसलेल्या जव्हार तालुक्यात पावसाचे प्रमाण अधिक आहे. या ठिकाणी पाणी अडविण्याचे आणि जिरविण्याचे शाश्वत उपक्रम नसल्याने येथील शेतकऱ्यांना केवळ पावसाच्या पाण्यावर शेती करावी लागते.

यातून मिळणारे उत्पन्नही अल्प असते. त्यातच निसर्गाच्या लहरीपणामुळे केव्हाही ऊन पावसाचा खेळ सुरू होतो. शेतीवर करण्यात आलेला उत्पादन खर्च अक्षरशः पाण्यात जातो. त्यामुळे येथील शेतकरी निसर्गाच्या लहरीपणाला कंटाळून आपापली शेती बटाईने देण्याचे प्रमाण वाढले आहे.

लहरी निसर्गाचा सामना करत शेती करणे, आता आतबट्ट्याचा व्यवहार बनत चालला आहे. यामुळे शेतजमीन बटाई अथवा ठेक्याने देण्याचे प्रमाणही वाढत आहे. स्वतःची शेती अन्य कोणाला कसण्यासाठी द्यावी आणि जमिनीचा भाडेपट्टा घेऊन निवांत राहावे, अशी मानसिकता शेतकऱ्यांमध्ये दिवसेंदिवस वाढत असल्याचे दिसून येते.

बियाणे, रासायनिक खते, कीटकनाशकांचे दर ज्या पटीने वाढत आहेत, त्या पटीने शेतमालाचे दर मात्र न वाढल्याने शेतकरी अडचणीत आला. आधुनिक तंत्रज्ञानाचा वापर होऊन ट्रॅक्टरचा मोठ्या प्रमाणात वापर होऊ लागला. त्यामुळे अनेक शेतकऱ्यांनी आपापली बैलजोडी विक्रीला काढली. मोजक्याच शेतकऱ्यांकडे पशुधन उरले आहेत.

शेणखताला सोन्याचा भाव आला आहे. शेणखताच्या एका ट्रॉलीसाठी दोन हजार रुपयांपेक्षा अधिक पैसे मोजावे लागतात. शेतमजुरांच्या मजुरीचा दर दरवर्षी वाढत आहे. यंदा पुरुष एका दिवसाच्या कामाचे ४०० रुपये, तर महिला ३०० रुपये घेतात.

शेती कशी परवडते

बटाईने शेती करणाऱ्या व्यक्तीचे संपूर्ण कुटुंब शेतात राबते. शिवाय, त्यांच्याकडे बैलजोडी असते. यामुळे उत्पादन खर्च कमी होतो.

बटाई म्हणजे काय?

शेती बटाईने देणे म्हणजे शेती कसण्याकरिता दुसऱ्याला देणे. शेतीचा खर्च शेतकरी आणि कसणारा यांच्यात विभागला जातो. शिवाय, शेतीचे उत्पादनही दोघांमध्ये वाटून घेतले जाते.