Crop Damage : कळंबामध्ये भात, सोयाबीन वाचविण्यासाठी धडपड

Kolhapur News : कळंबा शेती गटाअंतर्गत चाळीसगावमध्ये परतीच्या पावसाने चांगलाच धुमाकूळ घातला असून भात, सोयाबीन पिकाला मोठा फटका बसला आहे.

परिपक्व झालेले पीक शेत शिवारामध्ये भुईसपाट झाले आहे. त्यामुळे भाताच्या ओंब्या पूर्णपणे चिखलाने माखून गेल्या असून सोयाबीन कुजण्याची भीती आहे. त्यामुळे उत्पादनात दहा ते वीस टक्के घट होणार आहे.

कळंबा, कात्यायनी, हणबरवाडी, पाचगाव, गिरगाव, चुये, कावणे, कोगील बुद्रुक, मोरेवाडी यासह चाळीसगावमध्ये साडेआठ हेक्टरपेक्षा जास्त क्षेत्रात भात, सोयाबीन पिकांची लागवड करण्यात आली होती.

भाताच्या ओंब्या वाऱ्याने डौलू लागल्यामुळे शेतकरी कापणीसाठी प्रयत्न करू लागले होते. मात्र मॉन्सूनोत्तर पावसाने शिवारात भात पिके भुईसपाट झाली. भात पिकांच्या ओंब्यांना जागेवरच कोंब येण्याची शक्यता असून हातातोंडाशी आलेले पीक वाया जाण्याची भीती आहे.