Power Supply Crisis : तीन महिन्यांपासून शेतीसाठी अवघा पाच तास वीजपुरवठा

Solapur News : पोथरे (ता. करमाळा) येथे गेल्या तीन महिन्यांपासून शेतीपंपाचा वीजपुरवठा अवघा पाच तास केला जात असून, तोही अत्यंत कमी दाबाने होत आहे. त्यामुळे अतोनात कष्ट करून जगवलेली पिके जळू लागली आहेत. वीज वितरण विभागाने दोन दिवसांत याकडे लक्ष घातले नाही, तर तीव्र आंदोलन करण्यात येईल, असा इशारा येथील शेतकऱ्यांनी दिला आहे.

यावर्षी मुबलक पाणी असल्याने येथील शेतकऱ्यांनी ऊस, केळी यांसारखी बागायती पिके मोठ्या प्रमाणात केली आहेत. मात्र पाणी असूनही वीज वितरणच्या कमी वीजपुरवठ्यामुळे येथील शेतकरी हैराण झाला आहे. फेब्रुवारी महिन्यापासून पोथरे येथील वीजपुरवठा भारनियमनाच्या नावाखाली अवघा पाच तास दिला जात आहे.

शिवाय, हा पुरवठाही कमी दाबाने मिळत आहे. त्यामुळे या पाच तास वीज पुरवठ्यातही कधी सबस्टेशनवरून वीज जाते तर कधी डीपी ट्रिप होतो. या सर्व परिस्थितीत वीजपुरवठा प्रत्यक्षात पाच तासांवरून तीन ते चार तास होत आहे.

त्यामुळे येथील हातातोंडाशी आलेली पिके पाणी असूनही जळू लागली आहेत. वीज वितरण विभागाने पूर्वीप्रमाणे आठ तास वीजपुरवठा केला नाही तर तीव्र आंदोलन करण्याचा इशारा येथील शेतकऱ्यांनी दिला आहे.