Farmer Issue : मदर डेअरी विरोधात शेतकऱ्यांचा रोष

Amravati News : मदर डेअरीच्या संकलन केंद्रावर गेल्या काही दिवसांपासून तिवसा शहरातील दूध उत्पादक शेतकऱ्यांचे दूध घेण्यास नकार देण्यात येत आहे. या विरोधात बुधवारी सातरगाव मार्गावर शेतकऱ्यांनी डेअरीच्या वाहनातील दूध फेकून कंपनीविरोधात रोष व्यक्त केला.

मदर डेअरीकडून जिल्ह्यातील विविध तालुक्यांतून एका सहाय्यकामार्फत दूध संकलन करण्यात येते. दूध संकलन करून त्यावर चांदुर रेल्वे तालुक्यातील कारला येथील केंद्रात प्रक्रिया केली जाते. यात तिवसा तालुक्यातील १३ गावांतून एकाच वेळी शेकडो लिटर दूध एका वाहनाद्वारे संकलन करण्यात येत होते.

मात्र गेल्या पाच दिवसांपासून येथील दूध उत्पादक शेतकऱ्यांचे दूध घेण्यास या कंपनीने नकार दिला जात असल्याचा आरोप तिवसा शहरातील दूध उत्पादकांनी केला आहे. मदर डेअरी प्रशासनाकडून कुठल्याही प्रकारची सूचना न देता अचानक दूध घेणे बंद केल्यामुळे येथील दूध उत्पादकांचे मोठ्या प्रमाणात आर्थिक नुकसान होत आहे. दूध संकलन सुरू करून दुधाच्या फॅटप्रमाणे पैसे देण्यात यावे, अशी मागणी लावून धरली होती.