Advance Crop Insurance : अकोल्यातील शेतकऱ्यांना मिळाली १०५ कोटी ४० लाख रुपयांची भरपाई

Akola News : जिल्हयात यावर्षी पावसाचा खंड पडल्याने आॅगस्टमध्ये खरीप हंगामाची स्थिती बिकट झाली होती. या काळातील नुकसानाची भरपाई म्हणून पंतप्रधान पीकविमा योजनेअंतर्गत २५ टक्के अग्रिम भरपाई देण्याचा अध्यादेश जिल्हाधिकाऱ्यांनी काढला होता.

यानुसार पीकविमा कंपनीने जिल्ह्यातील एक लाख ८६ हजार ६०७ शेतकऱ्यांना आत्तापर्यंत सुमारे १०५ कोटी ४० लाख रुपये खात्यात जमा केले आहेत. तांत्रिक कारणांमुळे अद्याप २६ हजारांवर शेतकऱ्यांना ही भरपाई खात्यात जमा होऊ शकलेली नाही

अकोला जिल्हयात या हंगामात पावसाचा खंड निर्माण झाला होता. परिणामी सोयाबीन या पिकाला सर्वाधिक फटका बसला. या पिकाची महत्त्वाची अवस्था आॅगस्टमध्ये सुरु होती. कुठे हे पीक फुल धारणेत तर कुठे शेंगा परिपक्व होण्याच्या अवस्थेत होते. याच काळात पाऊस न झाल्याने उत्पादकतेवर परिणाम होईल हे गृहीत धरीत जिल्हा समितीने पीकविमा कंपनीला २५ टक्के अग्रिम भरपाई देण्याचे निर्देश दिले होते.

त्यानंतर कंपनीने या महिन्यात कारवाई करीत शेतकऱ्यांना ही अग्रिम भरपाई खात्यात जमा करणे सुरु केले. जिल्ह्यातील सात तालुक्यात ५२ महसूल मंडलातील एक लाख ८६ हजार ६०७ शेतकऱ्यांना १०५ कोटी ४० लाख ७२ हजार २३९ रुपयांची भरपाई जमा करण्यात आलेली आहे.

२६३२६ शेतकरी प्रतीक्षेत

एकीकडे पावणे दोन लाख पेक्षा अधिक शेतकऱ्यांना अग्रिम भरपाई मिळाली असली तरी तांत्रिक अडथळ्यांमुळे जिल्ह्यातील २६ हजार ३२६ शेतकरी दूरच आहेत. या शेतकऱ्यांची प्रामुख्याने बँक खात्याशी निगडीत अडचणी आहेत.

काही शेतकऱ्यांच्या ईकेवायसी नसल्याने खात्याची माहिती जुळेनाशी झालेली आहे. याबाबत यंत्रणास्तरावर मार्ग काढण्याचे प्रयत्न सुरु आहेत. शिवाय कृषी खात्याची यंत्रणा सुद्धा ई-केवायसी करण्याबाबत मार्गदर्शन करू लागली आहे.