Urea Shortage: यवतमाळमध्ये युरियाच्या टंचाईमुळे शेतकरी हवालदिल

Yavatmal News: खरीप हंगामाच्या सुरुवातीलाच यंदा युरियाचा तुटवडा आहे. जूनमध्ये मागणीच्या तुलनेत कंपनीकडून झालेला पुरवठा कमी आहे. शेतकऱ्यांकडून मागणी होत असतानाही युरियाचा तुटवडा आहे. प्रशासनासमोर तुटवडा दूर करून युरिया उपलब्ध करून देण्याचे आव्हान आहे.

जिल्ह्यात यंदा नऊ लाखांहून अधिक हेक्टरवर खरिपाची पेरणी होणार आहे. पेरणीसाठी बियाणे, खते, कीटकनाशकांचे नियोजन कृषी विभागाने केले आहे. असे असले तरी हंगामाच्या सुरुवातीलाच सोयाबीन बियाणे, युरियाचा तुटवडा निर्माण झाला आहे. शेतकऱ्यांकडून मागणी असलेले सोयाबीन बियाणे बाजारात उपलब्ध नाही.

सोयाबीनचा तुटवडा निर्माण झाल्याने ठराविक ‘ब्रॅण्ड’च्या किमतीत वाढ झाली आहे. पावसाला विलंब झाला आहे. त्यातही बियाणे नसल्याने आणखी उशीर करण्यापेक्षा शेतकऱ्यांनी मिळेल त्या कंपनीच्या बियाण्यांची लागवड करण्यास सुरुवात केली आहे. अशा अडचणीच्या परिस्थितीला तोंड देणाऱ्या शेतकऱ्यांना आता युरियाच्या टंचाईचा सामना करावा लागत आहे.

सध्या जिल्ह्यात युरियाचा तुटवडा निर्माण झाला आहे. २०२५ च्या हंगामासाठी ६६ हजार १५३ टनांचा पुरवठा मंजूर आहे. जूनअखेर २९ हजार १०७ टनांचे नियोजन मंजूर आहे. यातील केवळ १४ हजार ९६० टनांचा पुरवठाच झाला आहे.

गेल्यावर्षीचा शिल्लक तसेच यंदाचा आलेला साठा मिळून ३७ हजार ५६६ टन युरिया उपलब्ध असल्याची नोंद आहे. या नंतरही शेतकऱ्यांना खत मिळत नसल्याची ओरड होत आहे. युरियाचा तुटवडा असल्याने कृषी विभाग, आरसीएफ कशा पद्धतीने नियोजन करणार, याकडे शेतकऱ्यांचे लक्ष लागले आहे.

अडीच लाख हेक्टरवरच पेरणी

पावसाने पाठ फिरविल्याने पेरणीची गती सुरुवातीला कमी होती. सुरुवातीच्या टप्प्यात यवतमाळ जिल्ह्यात केवळ २९ टक्के क्षेत्रावर लागवड झाली. नऊ लाख हेक्टरपैकी दोन लाख ६४ हजार २६० हेक्टरवर पेरणी झाली होती. यात सर्वाधिक एक लाख ८३ हजार ८७० हेक्टरवर कापूस, ५० हजार ८३० हेक्टरवर सोयाबीन तर २९ हजार हेक्टरवर तुरीची लागवड झाली. दोन दिवसांपासून पाऊस सुरू असल्याने पेरणीची गती वाढली आहे.