Soybean Market : शेतकऱ्यांना विकावे लागते बेभाव सोयाबीन

Cha Sambhaji Nagar News: दिवाळीसारखा मोठा सण काही दिवसांवर येऊन ठेपला आहे. त्यामुळे शेतकऱ्यांना सोयाबीनचा उत्पादित माल विकल्याशिवाय पर्याय नाही. कारण सोयाबीन विकूनच दिवाळी साजरी करावी लागणार आहे. परंतु, बाजारात सोयाबीनचे दर अत्यंत कमी आहेत. मात्र, असे असले तरी शेतकऱ्यांना बेभाव सोयाबीन विकावे लागणार आहे.

सध्या बाजारात तीन हजार पाचशे ते चार हजार तीनशे रुपये प्रतिक्विंटल एवढा दर आहे. सोयाबीनला हमीभाव चार हजार आठशे रुपयांपेक्षा जास्त असला, तरी सरकारी सोयाबीन खरेदी केंद्र सुरू नाहीत; तसेच हमीभाव केंद्रावर सोयाबीन विकली, तरी तत्काळ पैसे मिळत नाहीत. पैसे येण्यास दोन ते तीन आठवड्यांचा कालावधी लागतो.

त्यामुळे सध्या बेभाव सोयाबीन विक्री केल्याशिवाय शेतकऱ्यांना पर्याय नाही. अनेक शेतकरी कामापुरते सोयाबीन विक्रीस टाकत आहेत. सोयाबीनची थप्पी तशीच घरात पडून आहे. बाहेर विकायला भाव नाही. घरात ठेवायला जागा नाही, अशी अवस्था शेतकऱ्यांची झाली आहे.