Farmer Assistance: भुईमूग वाहून गेलेल्या शेतकऱ्याला प्रशासनाच्या मदतीची प्रतीक्षाच!

Nagpur News: बाजार समितीमधून पाण्याच्या प्रवाहासोबत भुईमूग शेंगा वाहून गेल्यानंतर मानोरा बाजार समितीच्या कारभाराविरोधात तीव्र असंतोष व्यक्‍त होत होता. या संदर्भातील वृत्त ‘ॲग्रोवन’मध्ये प्रकाशित झाल्यानंतर बारवा गावच्या या शेतकऱ्याप्रती अनेकांनी मदतीचा हातही पुढे केला. मात्र प्रशासनाकडून अद्यापही या शेतकऱ्याला मदतीची प्रतीक्षा आहे.

बारवा गावातील इंदल पवार यांची जेमतेम पाच एकर जमीन आहे. यातून कुटुंबाच्या गरजांची पूर्तता व्हावी याकरिता खरीप, रब्बी आणि त्यानंतर उन्हाळी पिके घेण्यावर त्यांनी भर दिला आहे. यंदा त्यांनी भुईमुगाची लागवड केली. परंतु किडरोगाचा प्रादुर्भाव त्यासोबतच अवकाळी पावसामुळे बुरशीजन्य रोग वाढीस लागले.

यातून जेमतेम एकरी सव्वा ते दीड क्‍विंटलवर उत्पादकता झाली. हा शेतीमाल इंदल पवार यांचा मुलगा गौरव याने विक्रीसाठी मानोरा बाजार समितीत आणला. मात्र या ठिकाणी शेतकऱ्यांचा माल ठेवण्याची योग्य व्यवस्था नसल्याने अचानक आलेल्या

पावसात ७० ते ८० टक्‍के भुईमूग शेंगा वाहून गेल्या. या संदर्भाचे वृत्त ‘ॲग्रोवन’मध्ये प्रकाशित होताच राज्यभरातून कोट्यवधी रुपयांचे उत्पन्न घेणाऱ्या बाजार समिती व्यवस्थेविषयी संतप्त प्रतिक्रिया उमटल्या. याची दखल थेट केंद्रीय कृषिमंत्री शिवराजसिंह चौहान यांनी थेट गौरव पवार यांना फोन लावत झालेल्या प्रकाराची माहिती घेतली. केंद्र सरकार शेतकऱ्यांच्या सदैव पाठीशी असल्याचे सांगून श्री. चौहान यांनी स्थानिक प्रशासनाच्या माध्यमातून भरपाई मिळवून देण्याबाबत आश्‍वस्त केले. तसेच सोमवारपर्यंत (ता.१९) मदत मिळेल, असाही दावा त्यांनी केला होता.

‘ॲग्रोवन’च्या आवाहनातून मिळाली मदत

‘ॲग्रोवन’ने सामाजिक बांधिलकी जपत मदतीचे आवाहन केले होते. त्यानुसार राज्यभरातून सामान्य नागरिकांनी ऑनलाईन पद्धतीने वीस हजार रुपयांची मदत मंगळवारपर्यंत (ता.२०) पवार कुटुंबीयांच्या खात्यात जमा झाली होती. त्यासोबतच मानोरा बाजार समितीचे सभापती डॉ. संजय रोठे यांनी देखील वीस हजार रुपयांचा धनादेश या कुटुंबाला दिला.