Chana Crop : परभणीत हजारो हेक्टरवरील हरभऱ्यावर फिरवली वखर

Parbhnai News : मॉन्सूनोत्तर पावसामुळे हरभरा पिकांवर मोठ्या प्रमाणावर मर रोगाचा प्रादुर्भाव झाला आहे. पीक विरळ झाले आहे. त्यामुळे पाथरी तालुक्यासह जिल्ह्यातील अनेक शेतकऱ्यांनी हजारो हेक्टरवरील हरभऱ्यावर हरभऱ्यावर वखर फिरवला आहे. सुरुवातीच्या पेरणीवर केलेला खर्च वाया गेला असून, दुबार पेरणीचा भुर्दंड बसला आहे.

खरिपातील सोयाबीननंतर रब्बीत हरभरा ही पीक पद्धती किफायतशीर ठरत असल्यामुळे जिल्ह्यातील सर्वच तालुक्यांत गेल्या काही वर्षांत हरभऱ्याचे क्षेत्रात वाढ झाली आहे.

नोव्हेंबर महिन्याच्या अखेरच्या आठवड्यात जिल्ह्यात जोरदार मॉन्सूनोत्तर पाऊस झाला. हरभरा पिकांत मोठ्या प्रमाणावर पाणी साचून राहिले. अतिरिक्त पाण्याचा निचरा न झाल्यामुळे बुरशीजन्य मर रोगाचा प्रादुर्भाव तसेच घाटे आळीच्या प्रादुर्भावामुळे हरभऱ्याचे पीक विरळ झाले.

त्यामुळे शेतकऱ्यांना सुरुवातीला पेरणी केलेले हरभऱ्याचे पीक मोडून टाकावे लागत आहे. वाघाळा (ता. पाथरी) येथील शेतकरी त्र्यंबक घुंबरे यांनी १० एकर हरभऱ्यावर वखर फिरविला.

यासह तालुक्यातील अनेक गावांतील शेतकऱ्यांवर मर रोगामुळे हरभरा मोडून टाकण्याची वेळ आली आहे. हरभरा पीक बाधित झाल्याने नुकसान भरपाई मिळावी, अशी मागणी त्रिंबक घुंबरे, भागवत घुंबरे, सुनीता घुंबरे या शेतकऱ्यांनी तहसीलदारांना निवेदनाद्वारे केली आहे.