Agriculture Degree Admission: कृषी पदवीसाठी अर्ज भरण्यास रविवारपर्यंत मुदतवाढ

Pune News: राज्यात कृषी व कृषिसंलग्न व्यावसायिक पदवी अभ्यासक्रमांसाठी प्रवेश अर्ज दाखल करण्यास २७ जुलैपर्यंत मुदतवाढ देण्यात आली आहे. कृषी व कृषिसंलग्न व्यावसायिक पदवी अभ्यासक्रमांसाठी २०२५-२६ शैक्षणिक वर्षाकरिता राज्यात १७ हजार ७७६ जागांसाठी प्रवेश दिले जातील. प्रवेशासाठी केंद्रिभूत प्रवेश प्रक्रिया राबविली जाणार आहे. त्याकरिता ऑनलाइन प्रवेश भरण्यास चार जुलैपासून सुरुवात झाली आहे.

प्रवेश अर्ज भरण्याची मुदत यापूर्वीच्या वेळापत्रकानुसार १७ जुलैस समाप्त झाली होती. परंतु महाराष्ट्र कृषी शिक्षण व संशोधन परिषदेच्या महासंचालक श्रीमती वर्षा लड्डा यांनी मुदतवाढीचा प्रस्ताव राज्य सामाईक प्रवेश परीक्षा कक्षाला सादर केला. ग्रामीण भागातील विद्यार्थ्यांना पाऊस तसेच इंटरनेट संपर्कातील गैरसोयी यामुळे वेळेत अर्ज भरता आलेले नाहीत. त्यामुळे मुदतवाढ मिळावी, असे परिषदेचे म्हणणे होते.

खासगी महाविद्यालयांमध्ये यंदा १४१५० जागा

परीक्षा कक्षाचे आयुक्त दिलीप सरदेसाई यांनी कृषी परिषदेच्या प्रस्तावानुसार दहा दिवसांची मुदतवाढ दिली आहे. “राज्यात विविध नऊ विद्याशाखांमध्ये पदवी अभ्यासक्रमांच्या सरकारी महाविद्यालयांमधील जागा तीन हजार ६२६ इतक्या आहेत. तसेच खासगी महाविद्यालयांमधील जागांची संख्या १४ हजार १५० आहे.

प्रवेश अर्ज भरताना विद्यार्थ्यांना विविध प्रकारचे दाखले, उतारे अपलोड करावे लागतात. काही भागात सरकारी कार्यालयांमधून दाखले वेळेत मिळत नाहीत. त्यामुळे इच्छा असूनही कृषी अभ्यासक्रमांसाठी अर्ज भरता आलेले नव्हते. मात्र, आता अर्ज भरण्यास मुदतवाढ मिळाल्यामुळे विद्यार्थ्यांची गैरसोय दूर झाली आहे. त्यामुळे अर्जांची संख्यादेखील वाढू शकते, अशी माहिती परिषदेच्या सूत्रांनी दिली.