District Development Plan : छत्रपती संभाजीनगर जिल्हा विकास आराखड्यासाठी कार्यकारी समितीची बैठक

Chhatrapati Sambhajinagar News : ‘‘जिल्हा विकास आराखडा’’ तयार करणे व त्याला गुणात्मक साह्य देण्यासाठी पालकमंत्री यांच्या अध्यक्षतेखाली जिल्हास्तरीय कार्यकारी समितीची स्थापना करण्यात आली.

जिल्हा विकास आराखडा तयार करण्याचे काम एप्रिल ते जून २०२३ या तीन महिन्यांच्या कालावधीत पूर्ण करावयाचे आहे. या अनुषंगाने पालकमंत्री यांच्या प्रमुख उपस्थितीत आणि जिल्हाधिकारी यांच्या अध्यक्षतेखाली जिल्हास्तरीय कार्यकारी समितीची बैठक नुकतीच जिल्हा नियोजन समिती सभागृहात पार पडली.

या बैठकीस आमदार हरिभाऊ बागडे, पोलिस अधीक्षक मनीष कलवानिया, निवासी उपजिल्हाधिकारी तथा सदस्य सचिव जनार्दन विधाते, मुख्य कार्यकारी अधिकारी विकास मीना, जिल्हा अधीक्षक कृषी अधिकारी प्रकाश देशमुख, जिल्हा नियोजन अधिकारी भारत वायाळ, एमआयटीचे संचालक संजय देशमुख, वि उपस्थित होते.

बैठकीच्या सुरुवातीस जिल्हाधिकारी यांनी ‘‘जिल्हा विकास आराखडा’’ तयार करण्यासाठीच्या बैठकीची पार्श्‍वभूमी विशद केली. त्यानंतर जिल्हा नियोजन अधिकारी यांनी जिल्हा विकास आराखडा तयार करण्यासंदर्भात शासनाच्या मार्गदर्शक सूचनांचे सविस्तरपणे मांडल्या.

पालकमंत्री श्री. भुमरे म्हणाले, की जिल्हा विकास आराखडा तयार करण्यासाठीचा प्रस्ताव तयार करताना तालुका व गावपातळीवर आवश्यक असणाऱ्या सर्व बाबीं विचारात घेऊन योजनांचा आराखडा सादर करावा.

मराठवाडा इन्स्टिट्यूट ऑफ टेक्नॉलॉजी संस्थेशी सामंजस्य करार...

जिल्हाधिकारी श्री. पाण्डेय म्हणाले, ‘जिल्हा विकास आराखडा’ तयार करण्यासाठी तांत्रिक सल्लागार म्हणून ग्रामोद्योग शिक्षण मंडळ संचलित ‘‘मराठवाडा इन्स्टिट्यूट ऑफ टेक्नॉलॉजी’’ या संस्थेची निवड करण्यात आली आहे. या संस्थेसोबत ‘सामंजस्य करार’ देखील करण्यात आला आहे.

सर्व संबंधित कार्यान्वयन यंत्रणांनी त्यांचेशी संबंधित योजनांचा “जिल्हा विकास आराखडा” तयार करण्यासाठी तातडीने प्रस्ताव तयार करावेत. यासाठी संबंधित कार्यान्वयीन यंत्रणेने त्यांचे कार्यालयातील एका अधिका-याची “नोडल अधिकारी” म्हणून नियुक्ती करावी, अशा सूचना केल्या.