Equal Opportunity: भरती प्रक्रियेत कम्युनिटी सायन्स पदवीधरांना समान संधी द्यावी

Parbhani News: शासनाच्या विविध विभागांतील भरती प्रक्रियेत वसंतराव नाईक मराठवाडा कृषी विद्यापीठाच्या बी.एस्सी. (ऑनर्स), कम्युनिटी सायन्स (सामुदायिक विज्ञान) पदवी प्राप्त उमेदवारांना बी.एस्सी. होम सायन्स (गृहविज्ञान) पदवी प्राप्त उमेदवारांप्रमाणेच समान संधी उपलब्ध करून द्याव्यात. त्याअनुषंगाने शासन निर्णय (जी.आर.) निर्गमित करण्यात यावा, अशी मागणी कुलसचिव संतोष वेणीकर यांनी कृषी व पशुसंवर्धन, दुग्ध व्यवसाय विकास, मत्स्य व्यवसाय विभागाच्या उपसचिव प्रतिभा पाटील यांना पाठविलेल्या पत्राद्वारे केली आहे.

वसंतराव नाईक मराठवाडा कृषी विद्यापीठअंतर्गत पूर्वीच्या बी.एस्सी. होम सायन्स (गृहविज्ञान) पदवीचे नाव बदलून बी.एस्सी.(ऑनर्स) कम्युनिटी सायन्स (सामुदायिक विज्ञान) पदवी असे करण्यात आले आहे. परंतु बी.एस्सी. ऑनर्स कम्युनिटी सायन्स पदवी ही शैक्षणिक अर्हता शासनाच्या विविध विभागांतील पदांच्या भरती प्रक्रियेच्या निकषात बसत नसल्याचे सांगितले जात आहे.

आरोग्य विभागांतर्गत आहारतज्ज्ञ पदाच्या परीक्षेत उत्तीर्ण झालेल्या काही बी.एस्सी.(ऑनर्स) कम्युनिटी सायन्स पदवीधर उमदेवारांना अपात्र ठरविले. संबंधित उमेदवारांनी कृषी विद्यापीठ प्रशासनाची भेट घेतली.

त्यानंतर कुलसचिव वेणीकर यांनी पत्र पाठविले. त्यात वसंतराव नाईक मराठवाडा कृषी विद्यापीठातील सामुदायिक विज्ञान पदवी अभ्यासक्रम पूर्ण केल्यानंतर प्रदान करण्यात येणारी बी.एस्सी.(ऑनर्स) कम्युनिटी सायन्स ही पदवी तसेच बी.एस्सी. होम सायन्स या दोन्ही पदव्या नामाभिधानामुळे वेगळ्या दिसून येत असल्या तरी त्या एकच आहेत.

त्यामुळे राज्य शासनातर्फे होणाऱ्या पदभरतीकरिता तसेच विविध स्पर्धात्मक परीक्षांसाठी पात्रतेचा निकष म्हणून ग्राह्य धरण्यात यावी. त्यामुळे बी.एस्सी.(ऑनर्स) कम्युनिटी सायन्स आणि बी.एस्सी. होम सायन्स पदवीधारकांना राज्य शासनाच्या विविध स्पर्धा परीक्षांद्वारे विविध पदांच्या भरती प्रक्रियेत समान संधी प्राप्त होईल, अशी विनंती वेणीकर यांनी केली आहे.