Agrowon Sanvad : भातपिकासह व्यावसायिक पिकांवरही भर द्या

Bhandara News : धानाचे कोठार अशी भंडारा जिल्ह्याची ओळख असली, तरी एकाच पिकावर अवलंबिता असल्याने त्यातून अपेक्षीत उत्पन्न मिळत नाही. त्यामुळे दुबार पीक किंवा व्यावसायिक पिकांच्या लागवडीसाठी या भागातील शेतकऱ्यांनी पुढे आले पाहिजे, असे आवाहन जिल्हा परिषदेचे कृषी विकास अधिकारी प्रमोद वानखेडे यांनी केले.

दैनिक ‘ॲग्रोवन आणि कोरोमंडळ इंटरनॅशनल लिमिटेड’ यांच्या संयुक्‍त सहकार्याने कोका येथील बिरसामुंडा सभागृहात आयोजित ॲग्रोवन संवाद कार्यक्रमात ते बोलत होते. या वेळी नवनियुक्‍त कृषी विकास अधिकारी विकास सोनवणे, कोरोमंडल इंटरनॅशनल लिमिटेडचे विभागीय व्यवस्थापक बी. बी. पांडा, विकास साखरे, माजी सरपंच मारोती उईके यांची उपस्थिती होती.

कृषी विकास अधिकारी विकास सोनवणे यांनी धान पिकाचे शास्त्रोक्‍त व्यवस्थापन, कीड-रोग नियंत्रण त्यासोबतच फवारणी दरम्यान घ्यावयाची काळजी अशा विविध विषयांवर मार्गदर्शन केले. कीटकनाशकांची फवारणी करताना सुरक्षा उपायांकडे दुर्लक्ष केले जाते. त्यामुळे विषबाधा होण्याचा धोका वाढतो.

राज्यात अशा अनेक घटनांमधून ही बाब सातत्याने समोर आली. त्यानंतर देखील सुरक्षा साधनांचा वापर न करताच फवारणी केली जाते. यामध्ये थेट जिवाची जोखीम असल्याने हे प्रकार टाळले पाहिजे, असे ते म्हणाले. सुजित जुनघरे यांनी सूत्रसंचालन केले. विजय साखरे यांनी आभार मानले. ॲग्रोवनचे वितरण प्रतिनिधी शशांक पावडे यांनी ॲग्रोवनविषयी माहिती दिली. कार्यक्रमाकरिता वैभव गुम्मडवर तसेच भोजराज हातझाडे यांचे सहकार्य मिळाले.

कोरोमंडल इंटरनॅशनल लिमिटेडचे विभागीय व्यवस्थापक बी. बी. पांडा यांनी कंपनीच्या माध्यमातून उत्पादित खत, त्याचा धान पिकात वापर, नॅनो युरिया, सल्फर, स्फुरद, पालाश, बोरॉन या खताचे वापर व महत्त्व याविषयी मार्गदर्शन केले.