Sugarcane Crushing : ‘विठ्ठल’चे १०७ दिवसांत आठ लाख टन ऊस गाळप

Pandharpur News : तालुक्यातील गुरसाळे येथील श्री विठ्ठल सहकारी साखर कारखान्याने चालू गळीत हंगामात आतापर्यंत १०७ दिवसांमध्ये ८ लाख ५ हजार ८४५ मेट्रिक टन उसाचे गाळप केले आहे. कारखान्याचे आजपर्यंतच्या इतिहासात १०७ दिवसामध्ये आठ लाख गाळप होण्याची पहिलीच वेळ आहे.

बी हेवी मोलॅसेसमधील साखरेची घट गृहीत धरुन सरासरी १०.६३ टक्के उताऱ्याने आठ लाख ११ हजार ४५० क्विंटल साखरेचे उत्पादन झाले आहे, अशी माहिती कारखान्याच्या चेअरमन अभिजित पाटील यांनी दिली. श्री. पाटील म्हणाले, एकूण ऊस गाळपापैकी ८० टक्के म्हणजे सहा लाख ३१ हजार ८५५ टन उसाचे गाळप हे कार्यक्षेत्रातील सभासद व ऊस उत्पादक शेतकऱ्यांचे आहे.

उर्वरित २० टक्के ऊस म्हणजे १ लाख ७४ हजार टन कार्यक्षेत्राबाहेरील गेल्यावर्षी ज्यांनी ऊस दिला होता, त्या शेतकऱ्याचा उसाचे गाळप केले आहे. श्री विठ्ठल कारखान्याने आत्तापर्यंत केलेल्या गाळपामुळे ऊस बिलापोटी २३३ कोटी व तोडणी वाहतुकीपोटी ७२ कोटी ५० लाख, अशी एकूण ३०० कोटींची उलाढाल झालेली आहे.

पंढरपूर तालुक्यात आर्थिक उलाढाल झाल्याने शेतकरी व व्यापाऱ्यांमधून समाधान व्यक्त केले जात आहे. तसेच उपपदार्थ निर्मितीमध्ये आसवानी प्रकल्पातून ३९ लाख ४० हजार ४४८ लिटरचे स्पिरीट उत्पादन झाले असून सहवीज निर्मिती प्रकल्पातून ११४ दिवसांमध्ये चार कोटी ९४ लाख ८६ हजार युनिटचे उत्पादन झाले असून कारखाना वापर सोडून दोन कोटी ८० लाख युनिट विक्री केली आहे.

१५ जानेवारीअखेर गळितास आलेल्या उसाचे अनुदानासह बिल शेतकऱ्यांच्या बँक खात्यामध्ये वर्ग केलेले आहे. तसेच तोडणी वाहतूक बिलाचे पेमेंट ३१ जानेवारीअखेर बँकेत वर्ग केलेले आहे. फेब्रुवारी महिन्यात येणाऱ्या उसास २ हजार ९५० रुपयांप्रमाणे ऊसदर दिला जाणार असून ज्या शेतकऱ्यांचा ऊस मार्च महिन्यात येईल, त्या शेतकऱ्यांना तीन हजार रुपयांप्रमाणे दिला जाणार असल्याचेही ते म्हणाले.