Cotton Soybean Subsidy : कापूस, सोयाबीन अर्थसाह्यासाठी दोन लाखांवर शेतकऱ्यांचे ई-केवायसी प्रलंबित

Parbhani News : राज्य शासनाने कापूस व सोयाबीन उत्पादक शेतकऱ्यांना हेक्टरी ५ हजार रुपये अर्थसहाय्य जाहीर केले आहे. परभणी जिल्ह्यातील कापूस व सोयाबीनचे मिळून एकूण ५ लाखावर शेतकरी पात्र आहेत. शुक्रवार (ता. २०) पर्यंत ३ लाख २४ हजार ९६९ शेतकऱ्यांचे ई-केवायसी पूर्ण झाले तर २ लाख ४० हजार ९१५ शेतकऱ्यांचे ई-केवायसी प्रलंबित होते.

आधार व बँक खात्याशी संबंधित माहितीचा वापरासाठी १ लाख १८ हजार शेतकऱ्यांकडून संमतिपत्र किंवा नाहरकत पत्र येणे बाकी होते तर संबंधित शेतकऱ्यांनी गावाशी संबंधित कृषी सहाय्यकाकडे नाहरकत पत्र द्यावे. ई केवायसी करुन घ्यावे, असे आवाहन उपविभागीय कृषी अधिकारी रवि हरणे यांनी केले आहे.

गतवर्षी (२०२३) बाजारभाव कमी झाल्यामुळे कापूस व उत्पादक शेतकऱ्यांचे नुकसान झाले होते. त्याबद्दल राज्यशासनाकडून खरिपातील ई-पीकपाहणी पोर्टलवर नोंद असलेल्या कपाशी व सोयाबीनच्या क्षेत्रानुसार परिगणना करुन अर्थसाहाय्य देण्यात येणार आहे. २० गुंठे पेक्षा कमी क्षेत्रासाठी सरसकट १ हजार रुपये तर २० गुंठेपेक्षा अधिक क्षेत्रासाठी प्रतिहेक्टरी ५ हजार रुपये अर्थसहाय्य २ हेक्टरच्या मर्यादेत देण्यात येणार आहे.

अर्थसहाय्याची रक्कम थेट लाभार्थीच्या बँक खात्यावर जमा केली जाणार आहे. रक्कम वितरणापूर्वी आधार व बँक खात्याशी संलग्न असलेल्या माहितीचा वापर करण्यासाठी लाभार्थी शेतकऱ्याकडून वैयक्तिक संमतिपत्र किंवा सामूहिक नाहरकत पत्र संबंधित कृषी सहाय्यकाकडे जमा करणे आवश्यक आहे.

परभणी जिल्ह्यातील ९ तालुक्यांमध्ये एकूण २६४ कृषी सहाय्यक आहेत.कापूस उत्पादक १ लाख २९ हजारावर व सोयाबीन उत्पादक ४ लाख ३६ हजार मिळून एकूण ५ लाख ६५ हजार शेतकरी आहेत. कपाशीच्या ९८ हजार ३०९ व सोयाबीनच्या ३ लाख ४९ हजार ३२४ मिळून एकूण ४ लाख ४७ हजार ३४५ शेतकऱ्यांनी (७२.०६ टक्के) नाहरकत पत्र दिले आहेत. नाहरकत प्रमाणपत्र देऊन ई-केवायसी करुन घेण्याचे आवाहन कृषी विभागाकडून करण्यात आले आहे.

परभणी जिल्हा कापूस, सोयाबीन अर्थसाहाय्य स्थिती

तालुका ई-केवायसी पूर्ण ई-केवायसी प्रलंबित

परभणी ५३७०८ ४५२९७

जिंतूर ४९१९४ ३९७६८

सेलू ४०७७४ २९३२३

मानवत २४६२५ १८०९५

पाथरी २७६४२ १९८५२

सोनपेठ २२३११ १६५०५

गंगाखेड ३८८९१ २९९१७

पालम ३३३४० २०८७५

पूर्णा ३४४८४ २१२८३