Milk Rate Issue : दूधदरप्रश्नी प्रांताधिकारी कार्यालयासमोर शेण ओतून संताप

Nagar News : दुधाला ४० रुपये दर मिळावा यांसह विविध मागण्यांसाठी कोतूळ (ता. अकोले) येथे सुरू असलेल्या आंदोलनाकडे दुर्लक्ष केले जात असल्याने मंगळवारी (ता. २३) कोतूळ ते संगमनेर अशी शेतकऱ्यांनी ट्रॅक्टर रॅली काढण्यात आली.

त्यात कोतूळसह परिसरातील मिळून सुमारे साडेतीनशेपेक्षा अधिक ट्रॅक्टर सहभागी झाले होते. आंदोलनकर्त्यांनी संगमनेर येथे प्रांत अधिकारी कार्यालयासमोर शेण ओतून शासनाच्या भूमिकेचा निषेध केला.

गाईच्या दुधाला ४० रुपये मिळावा, दुधाला एफआरपी व रेव्हेन्यू शेअरिंगचे धोरण लागू करावे, दूध भेसळ थांबावी, पशुखाद्यांचे दर कमी करावेत इत्यादी मागण्यांसाठी नगर जिल्ह्यातील अकोले तालुक्यातील कोतूळ येथे १८ दिवसांपासून ठिय्या आंदोलन सुरू आहे.

मागण्यांकडे सरकार दुर्लक्ष करत असल्याने मंगळवारी कोतूळ येथून संगमनेरपर्यंत ५५ किलोमीटर शेतकऱ्यांनी किसान सभेचे नेते डॉ. अजित नवले यांच्या नेतृत्वाखाली ट्रॅक्टर रॅली काढली. सकाळी अकरा वाजता सुरू झालेली रॅली सव्वाचार वाजता प्रांत कार्यालयात पोहोचली. अकोले येथे रॅली थांबवून पोलिसांनी चर्चा करण्याचे आवाहन केले.

चर्चा झाली, मात्र त्यानंतर रॅली संगमनेरला आली. एकाचवेळी साडेतीनशेपेक्षा अधिक ट्रॅक्टर शहरात आल्याने वाहतूक कोंडी झाली. प्रातांधिकाऱ्यांना आंदोलनकर्त्यांनी निवेदन दिले. मागणी मान्य होईपर्यंत आंदोलन सुरू राहील. उलट आंदोलन अधिक तीव्र करू असा इशारा दिला. दरम्यान, मोठ्या प्रमाणात शेतकरी रॅलीत सहभागी झाले होते. शेतकरी नागरिकांनी रॅलीचे जागोजागी स्वागत केले.