Paddy Plantation : शिराळा तालुक्यात भात पेरणी ५० टक्के

Sangli News : शिराळा तालुक्यात आठवड्याभरात अपवाद वगळता पावसाने उघडीप दिल्याने गत आठवड्यापेक्षा १० टक्के खरीप, तर भात पेरण्या १८ टक्के जास्त झाल्या आहेत. गत आठवड्यात खरीप पेरणी ३१.५६, तर भात पेरणी ३२.२५ टक्के झाली होती.

या आठवड्यात रोप लावणीमुळे भात पेरणी ७० ते ८० टक्के होईल, असा कृषी विभागाचा अंदाज आहे. आता खरीप पेरणी ४३.६१, तर भात पेरणी ५०.८३ टक्के झाली आहे. तालुक्याची पेरणी ५० टक्क्यांवर गेली आहे. तालुक्यात आता होणारी भात लागवड केवळ रोप लावणीवर अवलंबून आहे. तालुक्यात आठवड्यापासून अपवाद वगळता पावसाने उघडीप दिली.

ओढ्याकाठी वा ओघळाच्या पाण्यावर सायफन पद्धतीने अथवा डिझेल इंजिनद्वारे कोरड्या शेतात पाणी सोडून रोप लावण केली जात आहे. तालुक्याच्या पश्चिम भागात ज्या ठिकाणी पाण्याची सोय नाही अशा ठिकाणी रोपे लावणीची कामे खोळंबली आहेत. काही ठिकाणी रोपांचा तुटवडा भासू लागल्याने वाळवा तालुक्यातील काही गावांतून रोपे आणून रोप लावण केली जात आहे.

यावर्षी १२ मे पासून मॉन्सूनपूर्व पावसाने हजेरी लावली. ८० टक्के धूळवाफ पेरण्या झाल्याच नाहीत. मे आणि जूनमध्ये पाऊस सुरू राहिल्याने रोपे लावणीसाठी तरू टाकता आले नाही. ज्यांनी तरू टाकले त्यांच्या शेतात पाणी साचून राहिल्याने तरू कुजले.

त्यांना तरूची दुबार पेरणी करण्याची वेळ आली. ज्या ठिकाणी धूळवाफ पेरण्या झालेल्या नाहीत त्या ठिकाणी रोप लावण करावी लागणार आहे. आता रोपे उपलब्ध झाली असून पाऊस नसल्याने चिखल करणे शक्य होत नाही.

पेरणी क्षेत्र २१ जुलैअखेर (हेक्टर)

कंसात झालेली पेरणी (हेक्टर) व टक्के

भात -११५०० (५८४६ ), ५०.८३ टक्के

खरीप ज्वारी- ३० (०), ० टक्के

मका -१२४६ (१८४ ), १४.७७ टक्के

नाचणी १२४ (२८), २२.५८ टक्के

एकूण - तृणधान्य १२९०० (६०५८), ४६.९६ टक्के

भुईमूग ४४९२ (१९१३), ४२.५९ टक्के

सोयाबीन ४४७८ (१५६७), ३४.९९ टक्के

एकूण गळीत धान्य ८९७० (३४८०), ३८.८० टक्के

एकूण खरीप २१८७० (९५३८), ४३.६१ टक्के.\