Kharif Crop Damage : सरासरीपेक्षा कमी पावसामुळे खरीप पिकांना ताण

Parbhani News : परभणी, हिंगोली जिल्ह्यातील १४ पैकी ११ तालुक्यात यंदा जून व जुलै महिन्यात अपेक्षित पावसाच्या सरासरीहून कमी पाऊस झाला. त्यात ऑगस्ट महिन्यातील पहिला आठवडा कोरडा गेला आहे.अनेक मंडलात जुलै- ऑगस्ट महिन्यात १५ ते २० हून अधिक दिवस पावसाचा खंड आहे. उन्हाचा चटका वाढला आहे.

हलक्या जमिनीवरील पिके माना टाकत आहेत. वाढीच्या, फुलोरा अवस्थेतील पिकांना पाण्याचा ताण बसला आहे. किडीचा प्रादुर्भाव झाला आहे. फुळगळ होत आहे. परिमाणी उत्पादनात मोठी घट येणार, असल्यामुळे शेतकऱ्यांच्या अडचणी वाढल्या आहेत.

यंदा परभणी जिल्ह्यात ५ लाख १८ हजार ४६७ पैकी ४ लाख ९९ हजार १८३ हेक्टरवर (९६.२८ टक्के ) तर हिंगोली जिल्ह्यात ४ लाख १० हजार ३९८ पैकी ३ लाख ५२ हजार २६ हेक्टरवर (८७.७८ टक्के) खरिपाची पेरणी झाली.

मूग पीक शेंगा भरण्याच्या, सोयाबीन वाढ तसचे फुलोरा अवस्थेत, कपाशीचे पीक पाते, फुले लागण्याच्या अवस्थेत आहेत. तर ज्वारी, बाजरी, तूर,उडीद ही पिके वाढीच्या अवस्थेत आहेत. सोयाबीनवक चक्रीभुंगा, पाने खाणारी अळी, कपाशीवर रसशोषक कीडींचा प्रादुर्भाव आढळून येत आहे.

यंदा जून महिन्यात परभणी जिल्ह्यातील ९ पैकी केवळ पूर्णा तालुक्यात सरासरीपेक्षा जास्त पाऊस झाला. जुलै महिन्यात परभणी, सोनपेठ, गंगाखेड, पालम, पूर्णा या ५ तालुक्यात सरासरीहून कमी पाऊस झाला.

जून व जुलै या दोन महिन्यांत अपेक्षित सरासरी पेक्षा कमी पाऊस झालेल्या तालुक्यांमध्ये परभणी, सेलू, मानवत, सोनपेठ, गंगाखेड, पालम, पूर्णा या ७ तालुक्यांचा समावेश आहे. जुलै महिन्यात परभणी, मानवत, सोनपेठ, गंगाखेड, पालम, पूर्णा या ६ तालुक्यांमधील २३ मंडलामध्ये कमी पाऊस झाला.हिंगोली जिल्ह्यात यंदा जून मध्ये सर्व ५ तालुक्यात सरासरीहून कमी पाऊस झाला.

जुलै महिन्यात हिंगोली, कळमनुरी, वसमत या ३ तालुक्यात सरासरीहून कमी पाऊस झाला. जुलै महिन्यात हिंगोली, कळमनुरी, वसमत, सेनगाव या ४ तालुक्यातील २० मंडलात सरासरीहून कमी पाऊस झाला. हिंगोली, कळमनुरी, वसमत, सेनगाव तालुक्यात जून व जुलैमधील सरासरीहून कमी पाऊस झाला.