Drought Crisis : दुष्काळामुळे सणासुदीसाठी चैतन्य उरलं नाही

Nashik News : खरीप हंगामात पाऊस झाला; पण तो असून नसल्यासारखा होता. खरिपातील जिरायती पिके हातातून गेली. नंतर झालेल्या पावसामुळे विहिरीत पाणी आले. या थोड्याफार पाण्यावर भाजीपाला केला; मात्र तोही आता करपून चालला आहे. रब्बी हंगामातील पिके आता येणार नाही. तळ गाठण्यापूर्वी जनावरांना घास पेरायचा होता.

त्यासाठी वाफे बांधून ठेवले, मात्र आता विहिरीने तळ गाठल्याने तो पेरता आला नाही. पाणी संकट असल्याने खर्च आणि मेहनत वाया जाण्यापेक्षा आता घास पेरणी थांबविली आहे. दिवाळी झाली की पिण्याचा गंभीर प्रश्न अजूनच गंभीर होणार आहे. अशा परिस्थितीत आता जगायचं कसं, हा संघर्ष वाढत आहे. या दुष्काळामुळे सणासुदीला चैतन्य उरलं नाही, अशी कातरत्या आवाजात गंभीर स्थिती जिल्ह्यातील हिरापूर(ता.चांदवड) येथील शेतकरी कृष्णा पुंडलिक गोराणे यांनी सांगितली.

हिरापूर हे २,६०० लोकसंख्येचे गाव. मागील वर्षी परिस्थिती बरी होती; मात्र यंदा पाऊस नसल्याने परिस्थिती बिकट झाली आहे. जिरायती पिकांमध्ये मका, सोयाबीन, बाजरी, भुईमूग पेरणी होती. मात्र पावसामुळे पिकांची वाढच झाली नसल्याने उत्पादन नावापुरते हाती आले आहे. काही शेतकऱ्यांच्या द्राक्ष बागा दिसतात; मात्र पाणीटंचाईच्या पार्श्वभूमीवर त्याही अडचणीत आहेत.

सांगा दिवाळी साजरी करायची तरी कशी?

विहिरीत पाण्याचा पत्ता राहिला नाही. गावात पिण्याच्या पाण्याचा टँकर चालू आहे. यंदा पावसाळ्यात सुद्धा पिण्याचा पाण्याचा टँकर चालू होता. दिवाळीचा सण तोंडावर आहे, मात्र शेतकऱ्यांसाठी तो असून नसल्यासारखा आहे. हाती जे थोडेफार भांडवल होतं ते खर्च केले. मात्र हातात काहीच आलं नाही मग आता तुम्ही सांगा ही दिवाळी साजरी करायची तरी कशी, अशी परिस्थिती शेतकऱ्यांची आहे. आज अशी वाईट वेळ आली आहे तर पुढे पहिलासुद्धा पाणी उरणार नाही. विहिरीमध्ये पाणी आता येत नाही. थोडेफार पाणी बोरवेलमधून उपलब्ध होते, मात्र तेही थोडेफार असल्याने आता चिंता लागून राहिली आहे. शासनाने त्यासाठी मदत करावी.

दृष्टिक्षेपात हिरापूर

लोकसंख्या २,६१२ (२०११ जनगणणेनुसार)

एकूण क्षेत्र १,००३ हेक्टर

कृषक क्षेत्र ९५० हेक्टर

पीक क्षेत्र(हेक्टर)

द्राक्ष बागा १००

बाजरी ३०

मका २४८

मूग २०

भूईमूग १५

सोयाबीन ४३८

टोमॅटो २८

कांदा रोपे २५

खरीप कांदा ११०