Saathi Portal: खरिपात ‘साथी पोर्टल’वरून बियाणे वितरण आणि विक्री

Pune News: खरीप हंगाम २०२५ मध्ये सर्व प्रकारच्या बियाण्यांचे वितरण आणि विक्री केंद्र शासनाने विकसित केलेल्या ‘साथी पोर्टल’प्रणाली वरूनच होणार आहे. त्यामुळे शेतकऱ्यांनी साथी पोर्टल प्रणालीवरूनच बियाणे खरेदी करण्याबाबत आग्रह धरावा, असे आवाहन पुणे विभागीय कृषी सहसंचालक कार्यालयाच्या वतीने करण्यात आले आहे.

परराज्यांत उत्पादित झालेले मात्र महाराष्ट्रात वितरण व विक्री होणाऱ्या बियाण्यांना ‘साथी पोर्टल’ अनिवार्य करण्यात आले आहे. त्यामुळे सर्व बियाणे उत्पादक व विक्रेत्यांची पोर्टलवर नोंदणी करण्यात येणार आहे. या प्रणालीमुळे बियाणे उद्योगात पारदर्शकता, सुसूत्रता आणि विश्‍वासार्हता निर्माण होणार आहे.

या पोर्टलमुळे बियाणे उत्पादक कंपन्या, वितरक व विक्रेते यांच्यामध्ये समन्वय वाढणार आहे. डिजिटल प्रणालीमुळे सर्व संबंधित घटक एका प्लॅटफॉर्मवर आल्यामुळे व्यवस्थापन सोपे होणार आहे. बियाणे व्यवसायातील गैरप्रकाराला आळा घालण्यास मदत होणार असल्याचे कृषी सहसंचालक कार्यालयाच्या वतीने कळविण्यात आले आहे.