Paddy Disease : भातावर बगळ्या, तर नागलीवर करप्याचा प्रादुर्भाव

Mokhada News : तालुक्यातील खरीप हंगामातील भात, नागली आणि वरई या मुख्य नगदी पिकांना पावसाची उत्तम साथ मिळाली. आता पिके बहरून गोंडे (लोंबे) बाहेर टाकत असताना भातपिकावर बगळ्या, तर नागलीवर करप्या रोगाचा प्रादुर्भाव झाला आहे. त्यामुळे उभी पिके करपून गेली आहेत. हातातोंडाशी आलेले पीक हातून जाणार असल्याने शेतकरी हवालदिल झाले आहेत.

तालुक्यात खरिपाचे १२ हजार ७५९ हेक्टर क्षेत्र आहे. यामध्ये नागली चार हजार ३२२ हेक्टर, वरई तीन हजार ८८५ आणि भाताचे दोन हजार १५ हेक्टर क्षेत्र आहे. या मुख्य नगदी तृणधान्य पिकाचे एकूण १० हजार २२३ हेक्टर क्षेत्र आहे. त्या खालोखाल उडीद, कुळीद, तूर या कडधान्याचे एक हजार ७८८ हेक्टर क्षेत्र आहे. भुईमूग, सूर्यफूल, खुरासणी आणि तीळ या गळीत धान्याची ७४७ हेक्टर क्षेत्रावर मोखाड्यात यंदाच्या पावसाळ्यात शेती करण्यात आली आहे.

यंदा खरीप हंगामाला उपयुक्त पाऊस बरसल्याने पेरणी आणि लावणीची कामे वेळेत झाली. त्यानंतर उत्तम पाऊस झाल्याने शेती बहरली आहे. गणेशोत्सवानंतर हळवी पिके गोंडा बाहेर टाकू लागली आहेत. त्यामुळे शेतकरी आनंदी झाला होता, मात्र हा आनंद जास्त काळ टिकला नाही. गोंडा बाहेर टाकलेल्या भातपिकांवर बगळ्या, तर नागलीवर करप्या रोगाने घाला घातला आहे.

पंचनामे करण्याची मागणी

पिकांवरील झालेल्या रोगाची छायाचित्रे कृषी अधिकाऱ्यांना उमाकांत हमरे या शेतकऱ्याने दाखवली. त्यावर उपाययोजना करण्याची मागणी केली आहे, तसेच मोखाडा पंचायत समितीचे उपसभापती प्रदीप वाघ यांनी नुकसानग्रस्त शेतीची पाहणी करून पंचनामे करण्याची आणि भरपाई मिळण्याची मागणी केली आहे.