Koyna Dam : कोयना धरणातून विसर्ग पाचशे क्युसेकने कमी

Sangli News : उन्हाळी पाऊस झाल्याने जिल्ह्यातील विविध भागांतून शेतीसाठी पाण्याची मागणी कमी झाली आहे. परिणामी कोयना धरणातून पाण्याचा विसर्ग पाचशे क्युसेकने कमी करण्यात आला आहे.

सध्या २६०० क्युसेक विसर्ग केला जात असून टेंभू, ताकारी, म्हैसाळ या तीनही योजना कार्यान्वित आहेत. कर्नाटकात पाणी वाहून जाण्याने विसर्ग कमी करावा लागला आहे, अशी माहिती पाटबंधारे विभागाने दिली.

कोयना धरण व्यवस्थापनाकडे सांगली पाटबंधारे विभागाने पाण्याची मागणी कमी करण्याची सूचना केली होती. त्यानुसार धरणाच्या नदी विमोचक दरवाजातून ५०० क्युसेक विसर्ग कमी करण्यात आला आहे.

आता या दरवाजातून ५०० क्युसेक विसर्ग सुरू असून कोयना धरण पायथा विद्युतगृहाचे दोन्ही युनिट सुरू आहेत. त्यातून २१०० क्युसेक विसर्ग केला जात आहे. विसर्ग २६०० क्युसेक इतका ठेवण्यात आला आहे.

नदीतून पाण्याचा विसर्ग ३१०० क्युसेक सुरू होता. त्याचा परिणाम म्हणून कृष्णा नदीवरील बंधाऱ्यातून पाणी वाहून जात होते. म्हैसाळ बंधारा येथील पातळी १२ फुटांऐवजी १५ ते १६ फुटांवर पोहोचली होती.

त्यामुळे पाणी कमी करण्यात आले आहे. सांगलीत कृष्णा नदीच्या पाणी पातळीवर कोणताही विपरित परिणाम होणार नाही. पाण्याची कोणतीही अडचण येणार नाही. तसेच पाणी कमी केल्याने कोणताही विपरित परिणाम शेती किंवा शहर, गावांच्या पाण्यापुरवठ्यावर होणार नाही, असेही पाटबंधारे विभागाने स्पष्ट केले आहे.