Devgad Hapus : देवगड हापूसवर आता ‘युनिक कोड’ देणार

Sindhudurg News : देवगड हापूसचा दर्जा राखण्यासाठी आणि ग्राहकांची फसवणूक टाळण्याच्या हेतूने देवगड हापूस आंब्याला युनिक कोड देण्याचा निर्णय आंबा उत्पादक संस्थेने घेतला आहे. या निर्णयामुळे हापूसच्या नावाखाली होणाऱ्या बनावट विक्रीला पायबंद बसणार आहे.

देवगड आंबा उत्पादक सहकारी संस्थेच्या वतीने जामसंडे येथे आंबा बागायतदार चर्चासत्राचे आयोजन करण्यात आले होते. या चर्चासत्राला संस्थेचे अध्यक्ष ॲड अजित गोगटे, उपाध्यक्ष डी. बी. बलवान, सुधीर जोशी, संतोष पाटकर, जीआय तज्ज्ञ ओंकार सप्रे, युनिक कोड व्यवस्था तज्ज्ञ प्रशांत यादव, ऋषिकेश उलपे आदी उपस्थित होते.

आंबा बागायतदारांच्या चर्चासत्रात प्रामुख्याने देवगड हापूसच्या नावाखाली होणाऱ्या बनावट विक्रीला पायबंद घालण्यावर चर्चा झाली. देवगड हापूसला जगभरात पंसती असल्यामुळे त्याच नावाने अन्य आंब्याची विक्री केली जाते. यामुळे ग्राहकांची फसवणूक होते आणि देवगड आंब्याविषयी ग्राहकांच्या मनात सभ्रंमाचे वातावरण निर्माण होते.

हे थांबले पाहिजे यावर सर्व बागायतदारांचे एकमत झाले. सध्या हापूस आंब्याला ठाणे, रायगड, रत्नागिरी, सिंधुदुर्ग आणि पालघर या पाच जिल्ह्यांसाठी जीआय मानांकन मिळालेले आहे. परंतु बाजारात देवगड हापूसला पसंती असल्यामुळे देवगड हापूससाठी स्वतंत्र जीआय मिळावा यासाठी संस्थेने पुन्हा प्रयत्न करावेत, अशी मागणी आंबा उत्पादकांनी केली.

देवगड हापूसच्या नावाने होणारी बनावट विक्री थांबविण्यासाठी यापुढे देवगड हापूसवर युनिक कोड देण्याचा निर्णय या चर्चासत्रा दरम्यान घेण्यात आला. युनिक कोड पेटंट मिळालेल्या मुंबईतील एका कंपनीबरोबर संस्थेने करार केला असल्याची माहिती संस्था अध्यक्ष श्री. गोगटे यांनी दिली. यामुळे देवगड हापूसच्या नावाने होणाऱ्या बनावट विक्रीला चाप बसणार आहे.