Agriculture Development : शेतीसोबत जोडधंदा करून विकास साधावा : सुभाषराव ठाकरे

Washim News : शेतकऱ्यांनी केवळ शेतीवरच अवलंबून न राहता जोडधंदा करीत विकास साधावा असे आवाहन माजी राज्यमंत्री सुभाषराव ठाकरे यांनी केले. मंगरूळपीर कृषी उत्पन्न बाजार समितीच्या वतीने शेलुबाजार येथील उपबाजारात आयोजीत शेतकरी चर्चासत्रात ते अध्यक्षपदावरून बोलत होते.

या कार्यक्रमाला जिल्हा परिषद अध्यक्ष तथा कृषी उत्पन्न बाजार समितीचे सभापती चंद्रकांत ठाकरे, प्रयोगशील शेतकरी गणेशराव नानोटे, माजी कृषी अधिकारी प्रल्हाद शेळके, आदर्श शेतकरी रामेश्वर टेकाडे, तालुका कृषी अधिकारी रवींद्र इंगोले,

तालुका सहकारी शेतकी खरेदी-विक्री संघाचे अध्यक्ष शालिग्राम राऊत, नारायण बारड, महादेवराव सुर्वे, दत्तात्रय भेराणे, राजेंद्र मिसाळ, भाऊराव व्यवहारे, विनोद जाधव आदींची यावेळी प्रमुख उपस्थिती होती.

कार्यक्रमात ठाकरे पुढे म्हणाले, ‘‘शेतकऱ्यांनी कर्जाच्या ओझ्याने हताश होऊन आत्महत्या न करता बँकेसोबत एकरकमी कर्ज नील होण्यासाठी प्रयत्न करावे. अकोला- वाशीम जिल्हा मध्यवर्ती बँक शेतकऱ्यांना साडे सहा टक्के दराने तार कुंपणासाठी कर्ज देत असून याचा लाभ शेतकऱ्यांनी घ्यावा,’’ असेही ते म्हणाले.

चंद्रकांत ठाकरे, गणेशराव नानोटे, प्रल्हाद शेळके, रवींद्र इंगोले यांनीही मार्गदर्शन केले. कृषी बाजार समितीचे संचालक केशवराव भगत, राजू राऊत, अमोल पाटील व पदाधिकारी, संचालक उपस्थित होते.