Water Storage : धरणांमध्ये ४७.५४ टक्के पाणीसाठा

Palghar News : तालुक्यातील ग्रामीण व आदिवासी पट्ट्यात; तसेच शहर परिसरात यंदाचा कडक उन्हाळा जाणवत आहे. त्यामुळे एप्रिल, मे, तसेच जून महिनाही कडक उन्हाळा जातो की काय? अशा प्रकारच्या प्रतिक्रिया शेतकऱ्यांमधून उमटत आहे. दोन महिन्यांपासून ४१ ते ४२ पर्यंत तापमान गेले आहे.

त्यामुळे तालुक्यातील लघु पाटबंधारे योजनेच्या धरणातील पाण्याची पातळी खोल गेल्याचे चित्र आहे. सध्या लघु पाटबंधारे योजनेच्या पाच धरणांमध्ये सरासरी ४७ टक्के पाणीसाठा उपलब्ध आहे. या पाण्यावर रब्बी हंगामातील भाजीपाला पीक घेणाऱ्या शेतकऱ्यांना मोठ्या प्रमाणात फायदा होत आहे.

विढे धरणावर पाण्याचे नियोजन अतिशय चांगले आहे. धरणाचे पाणी चांगले असल्याने कोरावळे गावात नळाद्वारे पाणी सोडले जात आहे. सध्या धरणात जवळपास १८.६० टक्के सरासरी पाणीसाठा उपलब्ध आहे, अशी माहिती विढे धरणाच्या अधिकारी वर्गांनी दिली आहे.

मानवली लघु पाटबंधारे योजनेच्या धरणामध्ये पाण्याची पातळी ११७.८, तर जांभुडे धरणाची पातळी ७०.२, वांजले ९८, ठाकूरवाडी (शिरवली-मानिवली) - १०७.०५, तर खांडपे धरणात पाण्याची पातळी १०६.१५ अशी आहे. त्यामुळे सरासरी ४७ टक्के पाणीसाठा आहे. मुरबाड तालुक्यातील पाच धरणांमध्ये ५.३२ दशलक्ष घनमीटर साठा उपलब्ध आहे. तर ५२१.३० हेक्टर जमीन धरणाच्या क्षेत्राखाली आहे, अशी माहिती लघु पाटबंधारे उपविभाग मुरबाड उपअभियंता सु. रा. दांडकर यांनी दिली आहे.

उन्हाळी भातशेती हिरवीगार

पाच धरणांच्या पाण्याखाली ५२१.३० हेक्टर जमीन येत आहे. या धरणातील पाणीसाठा जूनपर्यंत पुरेल इतका आहे. सध्या ५.३२ द.ल.घ. मीटर पाण्याचा साठा उपलब्ध आहे. या पाण्यामुळे भाजीपाला पीक व उन्हाळी भातशेती हिरवीगार झाली आहे, असे उपअभियंता सु. रा. दांडकर यांनी सांगितले.

रब्बी हंगामातील सिंचन क्षेत्र (हेक्टरमध्ये)

योजनेचे नाव पाण्याखालील क्षेत्र

मानिवली १२७.८०

जांभुर्डे ६५.८८

शिरोशी २०७.४२

वांजळे ४८.६०

ठाकूरवाडी ८.४०

खांडपे ६३.२०

एकूण क्षेत्र ५२१.३०