Orange Fruit Drop Funds: "संत्रा फळगळतीसाठी १६५ कोटींचा निधी; शेतकऱ्यांना दिलासा"

Nagpur News : संत्रा फळगतीची दखल घेत राज्य शासनाकडून भरपाईपोटी १६५ कोटी रुपयांच्या निधीची तरतूद करण्यात आली आहे. अमरावती, अकोला, बुलडाणा तसेच आर्वी (वर्धा) जिल्ह्यांतील शेतकऱ्यांना ही मदत मिळणार आहे. नागपूर जिल्ह्याला यापूर्वीच २३ कोटी रुपयांचा निधी मिळाल्याने या शासन आदेशात नागपूरचा समावेश करण्यात आला नाही, असे सूत्रांनी सांगितले.

ऑगस्ट २०२४ मध्ये वातावरणातील बदल, पाऊस, ढगाळ वातावरण यामुळे संत्रा बागांमध्ये बुरशीजन्य रोगांचा प्रादुर्भाव वाढीस लागला होता. त्याचा फटका बसत संत्रापट्ट्यात मोठ्या प्रमाणावर फळगळती झाली. त्याची दखल घेत शासनाने भरपाई द्यावी, अशी मागणी होत होती. शासनाकडूनही संत्रा बागायतदारांच्या या मागणीच्या अनुषंगाने मदत जाहीर करण्यात आली आहे. परंतु या मदतनिधीतून नागपूर जिल्हा वगळण्यात आल्याने शेतकऱ्यांमध्ये तीव्र असंतोष व्यक्‍त होत आहे.

व्यापाऱ्यांच्या घशात जाणारा निधी रोखला

बांगलादेशने आयात शुल्कात वाढ केल्याच्या परिणामी नागपुरी संत्रा निर्यात प्रभावित झाली होती. त्यामुळे देशांतर्गत संत्रा दर कोसळले. त्याची दखल घेत १७० कोटी रुपयांची भरपाई पणन मंडळाच्या माध्यमातून जाहीर करण्यात आली. दर कमी मिळाल्यामुळे शेतकऱ्यांचे नुकसान झाले असताना तत्कालीन पणनमंत्री अब्दुल सत्तार यांनी मात्र व्यापारी हित जपत शेतकऱ्यांऐवजी निर्यातदार व्यापाऱ्यांसाठी निधी वितरणाचा आदेश काढला होता. विरोधानंतर मुख्यमंत्री देवेंद्र फडणवीस यांनी त्याला ब्रेक लावला होता. आता हा निधी फळगळती क्षेत्रातील शेतकऱ्यांना दिला जाणार आहे.

या भरपाईत नागपूर जिल्ह्याला वगळण्यात आल्याचा आरोप होत आहे. मात्र काटोल तहसीलदार श्री. रणवीर यांनी नागपूर जिल्ह्याला यापूर्वीच २३ लाख रुपयांचा निधी भरपाईपोटी मिळाल्याचे सांगितले. आता पुन्हा काटोलसाठी चार कोटी ७३ लाख, तर नरखेड तालुक्यासाठी पाच कोटी ३९ लाख रुपयांच्या निधीची मागणी करण्यात आल्याची माहिती त्यांनी दिली.

...अशी मिळणार मदत (बाधित क्षेत्र (हेक्‍टरमध्ये), शेतकरी संख्या, निधी (कोटी रुपयांत)

वर्धा : ३०१३.८५-- ५९३३--१०८४.९८

अमरावती : ३७७९३.८--४१९११--१३४६१.८३

अकोला : ३०२९.५०--३४३३--१०९०.६२

बुलडाणा : २६२६.८०--३८५२--९४५.६५

एकूण : ४६०६४.१२--५५१२९--१६५८३.०८