Ajit Pawar : शेतकऱ्यांच्या प्रश्नांसाठी पंतप्रधान मोदींची भेट घेणार : अजित पवार

Ajit Pawar Nashik Tour : महाराष्ट्रातील सत्तासंघर्षानंतर राष्ट्रवादीच्या नेत्यांच्या शपथविधीनंतर काल खातेवाटप करण्यात आले. उपमुख्यमंत्री अजित पवार यांनी राज्याच्या अर्थ व नियोजन विभागाचा पदभार स्वीकारत कामाला सुरुवात केली.

उपमुख्यमंत्री अजित पवार आज 'शासन आपल्या दारी' कार्यक्रमासाठी नाशिकमध्ये दाखल झाले. त्यांनी नाशिक येथे पत्रकार परिषद घेतली. यावेळी माॅन्सूनचा पाऊस न पडल्याने राज्यातील शेतकरी अडचणीत आहेत. त्यामुळे लवकरच पंतप्रधान नरेंद्र मोदी यांची भेट घेऊन शेतकऱ्यांचे प्रश्न मांडणार असल्याचे अजित पवारांनी सांगितले. केंद्र सरकारकडून अधिक मदत मिळवण्यासाठी प्रयत्न करणार असल्याचे देखील त्यांनी सांगितले.

खातेवाटपानंतर उपमुख्यमंत्री अजित पवार यांनी अर्थमंत्रीपदी पदभार स्वीकारला. आज सकाळी लवकर अजित पवार नाशिक येथील 'शासन आपल्या दारी' कार्यक्रमासाठी वंदे भारत ट्रेनने प्रवास केला. नाशिकमध्ये दाखल होताच त्यांचे राष्ट्रवादीच्या कार्यकर्त्यांनी जोरदार घोषणाबाजी केली. अजित पवारांच्या स्वागतासाठी देवळालीच्या आमदार सरोज अहिरे रेल्वे स्थानकावर हजर होत्या.

राष्ट्रवादीतील बंड केल्यानंतर शरद पवार यांनी महाराष्ट्र दौरा सुरू केला आहे. त्यांची पहिलीच सभा येवल्यात घेतली. त्यापाठोपाठ अजित पवारांनी नाशिकचा दौरा करत शरद पवार यांना धक्का दिला आहे.