Fadnavis As Chief Minister : मुख्यमंत्रीपदासाठी फडणवीस यांचे नाव निश्चित?; मुख्यमंत्री कोण आज होणार फैसला

Pune News : विधानसभा निवडणुकीत मतदारांनी महायुतीला स्पष्ट बहुमत दिले असून अद्याप मुख्यमंत्री कोण यावर पडदा कायम आहे. दरम्यान महायुतीच्या मुख्यमंत्रीपदासाठी बैठका सुरू असून यावर निर्णय भाजपची केंद्रीय समिती घेणार आहे. पण याआधीच महायुतीचा मुख्यमंत्री म्हणून उपमुख्यमंत्री देवेंद्र फडणवीस यांचे नाव फायनल झाले आहे. याबाबत भाजप नेते आमदार प्रवीण दरेकर यांनी देखील दुजोरा दिला आहे.

विधानसभा निवडणुकीत महायुतीला चांगले यश मिळाले असून वाढलेल्या मतदानातील टक्केवारीचा फायदा झाला आहे. यंदा ६५ टक्क्यांपेक्षा अधिक मतदान झाले असून ते लोकसभा निवडणुकीच्या तुलनेत अधिक आहे.

भाजपने १३२ जागा जिंकल्या असून शिवेसना (शिंदे) ५७, अजित पवार यांच्या राष्ट्रवादीने ४१ जागा जिंकल्या आहेत. तर मविआमधील काँग्रेसने १६, राष्ट्रवादी (शरद पवार) १०, उद्धव ठाकरे यांच्या शिवसेनेने २० ठिकाणी विजय मिळविला. महायुतीने एकूण २३५ जागा जिंकल्या असून मविआ फक्त ४६ आणि समाजवादी पार्टी २ आणि इतरांनी १० जागा जिंकल्या आहेत.

सर्वाधिक जागा भाजपने जिंकल्या असून सरकार स्थापन करण्यासाठी १४५ आमदारांचा पाठिंबा असणे गरजेचे आहे. मात्र महायुतीचा आकडा बहुमताच्या आकड्यापेक्षाही जादा असून भाजप सर्वात मोठा पक्ष म्हणून पुढे आला आहे. कार्यकर्त्यांकडूनही मुख्यमंत्री भाजपचाच असावा अशी आग्रही मागणी होत आहे.

यामुळे मुख्यमंत्रिपदासाठी फडणवीसांचे नाव निश्चित करण्यात आले आहे. तर याबाबत भाजप नेते आमदार प्रवीण दरेकर यांनी दुजोरा दिला असून फडणवीस यांचे नाव निश्चित होण्याचा भाजपचा कार्यकर्ता म्हणून आपल्याला आंनद होत असल्याचे त्यांनी म्हटले आहे. तर महाराष्ट्रातील तमाम जनतेने देवेंद्र फडणवीस यांच्यामागे आपलं बहुमत दिल्याचेही दरेकर यांनी म्हटले आहे.

याआधीच अजित पवार यांच्या राष्ट्रवादी काँग्रेसने महाराष्ट्राचा मुख्यमंत्री म्हणून फडणवीसांना पाठिंबा दिली आहे. तर आज नवी दिल्लीत मुख्यमंत्रिपदासाठी बैठक होणार आहे. यामुळे मुख्यमंत्री एकनाथ शिंदे, उपमुख्यमंत्री अजित पवार, उपमुख्यमंत्री देवेंद्र फडणवीस आज दुपारी दिल्लीला रवाना होणार आहेत.

दरम्यान राज्यात मुख्यमंत्रिपदासाठी २ फॉर्मुल्यावर महायुतीच्या बैठकीत चर्चा झाली आहे. यात मुख्यमंत्रिपदासाठी अडीच अडीच वर्षाचा फॉर्म्युला असावा अशी मागणी शिंदे गटाची आहे. ज्यात पहिल्या अडीच वर्षात मुख्यमंत्रीपद भाजपकडे आणि दुसऱ्या टप्प्यातील अडीच वर्ष मुख्यमंत्रीपद हे शिंदे गटाकडे असेल.

तर दुसऱ्या फॉर्म्युल्यानुसार मुख्यमंत्रि‍पदासाठी २-२-१ असा फॉर्म्युल्यावर चर्चा झाली आहे. या फॉर्म्युलानुसार भाजपकडे दोन वर्षे, शिंदे गटाकडे दोन वर्षे आणि अजित पवारांकडे एक वर्ष मुख्यमंत्रिपद असेल.