Chara Chavani : जुन्नरच्या पूर्व भागात चाराटंचाई ; चारा छावणी सुरू करण्याची मागणी

Pune News : पावसाचे तीन महिने लोटली तरी पुरेसा पाऊस पडलेला नाही. जुन्नर तालुक्याच्या पूर्व भागातील राजुरी, बेल्हे, आळे, आणे, नळावणे, बोरी, जाधव वाडी, शिंदेवाडी, उंच खडक, रानमळा आदी गावांत जनावरांच्या चाऱ्याचा प्रश्‍न गंभीर होऊ लागला आहे. त्याचा परिणाम दुग्ध व्यवसायावर होण्याची शक्यता शेतकरी वर्गातून होत असून, तालुक्यात चारा डेपो त्वरित सुरू करण्यात यावा, अशी मागणी शेतकऱ्यांनी आमदार अतुल बेनके यांच्याकडे केली आहे.

पावसाने दडी मारल्यामुळे सोयाबीनची पिके कोमेजून गेली आहेत. पाण्याचा प्रश्‍न गंभीर झाला असून, फळबागा वाचविण्यासाठी शेतकऱ्यांना मोठी कसरत करावी लागत आहे. काही ठिकाणी टँकरद्वारे विकत पाणी आणून फळबागा जगवण्याचा शेतकरी प्रयत्न करत आहेत. विहिरींनी तळ गाठला आहे. अनेक बोअरवेल बंद पडले अवस्थेत आहेत. पाण्याचे संकट ओढवल्यास दुष्काळाला सामोरे जावे लागत आहे. पाऊस न पडल्याने सध्याच्या परिस्थितीमध्ये चाऱ्याचा तुटवडा निर्माण झालेला आहे. त्याचबरोबर पशुखाद्याचे दर वाढलेले आहेत. वाढलेल्या किमतीत पशुखाद्य खरेदी करणे शेतकऱ्यांना न परवडणारे झाले आहे. अशातच पावसाने दडी मारल्यामुळे दूध उत्पादकांपुढे चाऱ्याचे संकट निर्माण झाले आहे.

जुन्नर तालुक्याचा पूर्व भाग दुष्काळ जाहीर करावा व तातडीने जनावरांच्या चाऱ्याचा प्रश्‍न मार्गी लावा, अन्यथा आंदोलन करण्यात येईल, असा इशारा गणेश दूध संस्थेचे अध्यक्ष बाळासाहेब हाडवळे यांच्यासह लक्ष्मण बंगाळे, गोविंद औटी, किरण औटी यांनी दिला आहे.

विहिरी, बोअरवेल कोरडेठाक

जुन्नर तालुक्याच्या पूर्व भागात सोयाबीन पेरणी मोठ्या प्रमाणात झाली आहे. पण सध्या पाऊस नसल्यामुळे पूर्ण पिके कोमेजून गेली आहेत. सोयाबीन पेरणीसाठी मशागत करून बी-बियाणे, खतांचा वापर करून ही केवळ पाण्याअभावी पिके कोमेजून जात असल्याने शेतकऱ्यांना मोठा आर्थिक फटका बसत आहे. त्यामुळे शेतकऱ्यांमध्ये चिंतेचे वातावरण निर्माण झाले आहे. तर पिकाला पाणी देण्यासाठी शेतकऱ्यांकडे विहिरी, बोअरवेला पाणी नाही.