Onion MSP : ‘कांद्याला हमीभाव द्या’

Nashik News : कृषी उत्पन्न बाजार समितीत कांदा दरात घसरण सुरूच असून शनिवारी (ता.२१) लिलाव सुरू झाल्यानंतर छावा सेना व कांदा उत्पादकांनी लिलाव बंद पाडत येवला-मनमाड मार्गावर रास्ता रोको आंदोलन केले.

देशात लाल कांद्याची आवक वाढल्याने लासलगावसह जिल्हाभरातील बाजार समित्यांमध्ये कांदा दरात मोठी घसरण झाली आहे. कांद्याला सरासरी १ हजार ५०० रुपये प्रति क्विंटल भाव मिळत असल्याने शनिवारी संतप्त छावा क्रांतिवीर सेना व कांदा उत्पादकांनी बाजार समितीतील लिलाव बंद पाडत येवला- मनमाड रस्त्यावर रास्ता रोको आंदोलन केले.

या वेळी तहसीलदार आबा महाजन, पोलिस निरीक्षक धीरज महाजन यांना निवेदन देत आंदोलन मागे घेण्यात आले.

यावेळी शेतकरी आघाडी जिल्हाप्रमुख गोरख संत, तालुकाप्रमुख प्रफ्फुल गायकवाड, विजय मोरे, छावा क्रांतिवीर सेनेचे पदाधिकारी संदीप पवार, सोपान लांडगे, गोरख कोटमे, संदीप बार्शीले, गोरख सांभारे, जालिंदर मेटकर, विजय चव्हाण, अण्णासाहेब सोमासे, कांदा उत्पादक उपस्थित होते.