Savitri River : सावित्री नदीच्या पाणी पातळीत घट

Mahad News : पावसाचा जोर कमी झाला असून सावित्री नदीची पाणी पातळीही सोमवारी सकाळी इशारा पातळीच्या खाली आल्याने नागरिकांनी सुटकेचा नि:श्वास सोडला आहे. महाड तालुक्यातील सर्व रस्त्यांवर आता वाहतूक सुरळीत सुरू झाली आहे.

तीन दिवसांत महाडमध्ये ४२५ मिलीमीटर पावसाची नोंद झाली असून तालुक्यातील सावित्री, गांधारी व काळ नद्यांनी धोक्याची पातळी गाठली होती. यामुळे प्रशासन अलर्ट मोडवर आले होते. रात्रभर नद्यांची पातळी नागरिकांना कळवली जात होती.

गांधारी नदीचे पाणी शहरातील दस्तुरी मार्गावर आल्याने या रस्त्यावरील वाहतूक रविवारी बंद करण्यात आली होती. तर महाड-म्हाप्रळ मार्गावरील रावढळ पुलावरून पाणी गेल्याने येथील वाहतूकही थांबली होती. याच मार्गावर गोठे गावाजवळ मोठे झाड उन्मळल्‍याने वाहतूक ठप्प झाली होती. सुमारे सहा तासानंतर झाड बाजूला करण्यात आले.

लाडवली पुलाचा पर्यायी मार्ग पाण्याखाली गेलेला होता. रात्री झालेल्या मुसळधार पावसाने किंजळघर गावातील अंगणवाडी शेजारी असणारे एक सभागृह कोसळले. सभागृहामध्ये व्यायाम शाळा चालवली जात होती. रात्रीची वेळ असल्याने कोणत्या स्वरूपाची जीवित हानी झाली नाही. सोमवारी पहाटेपासून पावसाचा जोर कमी झाल्‍याने पुलांवर आलेले पाणी ओसरल्‍याने जनजीवन पूर्वपदावर आले आहे.