Hingoli News : २०२३ च्या हंगामात हळद लागवडीस उशिरा झाला. त्यात पिकांच्या संवेदनशील अवस्थेत पावसाचा खंड पडला. कंदमाशी ही कीड तसेच करपा व कंदकुज रोगाचा प्रादुर्भाव यासह पोषक वातावरण नसल्यामुळे यंदा हिंगोली जिल्ह्यातील हळदीच्या उत्पादकतेत मोठी घट येत आहे. कीड, रोगाच्या व्यवस्थापनावर जास्त खर्च करावा लागला. उत्पादकता घटल्याने शेतकऱ्यांचे अर्थकारण कोलमडले आहे.
हिंगोली जिल्ह्यात २०२३ मध्ये २४ हजार १७१ हेक्टरवर हळद लागवड झालेली आहे. जिल्ह्यातील विविध हळद काढणीचा हंगाम सुरू आहे. शेत शिवारात हळद काढणी, शिजविणे, वाळवणे आदी कामे सुरू आहेत. सततच्या दुष्काळी स्थितीमुळे ऊस, केळी या पिकांच्या तुलनेत किफायतशीर ठरत असल्यामुळे जिल्ह्यातील शेतकरी पारंपरिक हळद पिकांकडे वळले.
गादी वाफा (बेड) लागवड, ठिबक सिंचन पद्धती, विद्राव्य खते, सूक्ष्म अन्नद्रव्यांच्या वापरामुळे उत्पादकतेत वाढ झाली. गेल्या काही वर्षांत हळद लागवड ते काढणी, काढणीपश्‍चात कामांचे यांत्रिकीकरण झाले. त्यामुळे मजुरीवरील खर्च कमी झाला. परंतु गेल्या काही वर्षांपासून कीड, रोगाचा प्रादुर्भाव वाढला आहे.
त्यात मागील दोन, तीन वर्षांत सततचा पाऊस, अतिवृष्टीमुळे पाणी साचून राहिल्याने कंदकुज, कंदसडीचे प्रमाण वाढले. त्यामुळे उत्पादकता कमी झाली आहे. कमी बाजारभाव वाढलेली मजुरी, यामुळे निव्वळ नफा कमी उरत असल्यामुळे गेल्यात तीन वर्षांपासून जिल्ह्यातील हळदीचे क्षेत्र कमी होत आहे. २०२२ तुलनेत हळदीच्या क्षेत्रात १० हजार ९१० हेक्टरने घट झाली आहे. २०२३ च्या जून अखेरपासून हळदीचे दरात सुधारणा झालेली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
