Paddy Crop Damage : कालव्याच्‍या पाण्यामुळे खांबमध्ये भातशेतीचे नुकसान

Roha News : कोलाड खांब परिसरात मॉन्सूनोत्तर पावसाने आधीच बळीराजाच्या हातातोंडाशी आलेला घास हिरावून घेतला आहे. दिवाळीत पाऊस थांबल्याने शेतकरी शेतातील उरलीसुरली धान कापणी, झोडणी, मळणीत व्यग्र असतानाच शुक्रवारी (ता. ९) रात्री अचानक कोलाड पाटबंधारे खात्याने कुंडलिका नदी सिंचनातून उजवा तीर कालव्यात पाणी सोडले.

परिणामी परिसरातील भातकापणी केलेल्या शेतात पाणी शिरल्याने शेतकऱ्यांचे मोठ्या प्रमाणावर नुकसान झाले आहे.

खांब परिसरातील शेतकऱ्यांनी भातकापणी सुरू केली आहे. दरम्‍यान पाटबंधारे खात्याने अचानकपणे कालव्यात पाणी सोडल्याने शेतात पाणी साचले आहे. त्‍यामुळे पुन्हा मोठ्या प्रमाणावर खांब, शिरवली, मुठवली, नडवली भागातील धानाचे नुकसान झाले आहे.

यामुळे परिसरातील शेतकरी अक्षरशः चिंताग्रस्त झाल्याचे दिसून येत आहे. त्‍यामुळे याला जबाबदार कोण? असा सवाल शेतकरी करीत आहेत.

शेतकरी वर्ग पाटबंधारे खात्याच्या विरोधात संताप व्यक्त करत आहे. तसेच संबंधित नुकसान भरपाई द्यावी, अशी मागणी शेतकरीवर्गाकडून करण्यात येत आहे.