Rain Update : येवला, सिन्नरमध्ये वादळी वाऱ्यासह पावसाचा तडाखा

Nashik News : जिल्ह्यात गेल्या तीन दिवसांपासून मॉन्सूनपूर्व पाऊस हजेरी लावत आहे. मात्र हा पाऊस वादळी वाऱ्यासह पडत असल्याने शेतकऱ्यांना काही प्रमाणात फायदा होत असला तरी अनेक ठिकाणी मोठे नुकसान होत असलेले समोर येत आहे.

जिल्ह्यात गुरुवारी (ता. ६) दुपारनंतर सिन्नर, येवला, इगतपुरी व नाशिक तालुक्यांत मॉन्सूनपूर्व पाऊस झाला. नाशिक व इगतपुरी तालुक्यांत तुलनेत सर्वाधिक पाऊस होता. देवळाली महसूल मंडळात ८४.५ मिमी पाऊस पडला असून येथे अतिवृष्टीची नोंद झाली आहे.

येवला तालुक्यातील पाटोदा, सावरगाव, जळगाव या महसूल मंडलांत मध्यम ते हलक्या सरी बरसल्या. मात्र वादळी वाऱ्यासह पाऊस बरसल्याने विविध ठिकाणी नुकसान आहे. अंदरसुल महसूल मंडलात हलक्या स्वरूपाचा पाऊस होता.

वादळी वारा अधिक असल्याने अनकाई येथे शेतकऱ्याच्या सोलर प्लेट उडून गेल्याने लाखो रुपयांचे नुकसान झाले आहे. बोकटे येथे हलका पाऊस पडून वादळाने नुकसान केले आहे. येथे दोन नारळाच्या झाडांवर वीज कोसळली. या वेळी झाडांनी पेट घेतल्याचे पाहायला मिळाले.

नाशिक जिल्ह्यात सर्वाधिक पावसाचा तालुका असलेल्या इगतपुरीमध्ये शहर व परिसरासह पश्चिम पट्ट्यात पावसाने जोरदार हजेरी लावली. भावली, मानवेढे, बोलीं, पिंपरीसदो, नांदगावसदो, कारवाडी, अवळखेड, चिंचलेखैरे, तसेच पूर्व भागासह घोटी भागात पाऊस झाला. त्यामुळे या भागात शेतीकामांना वेग येणार असल्याचे शेतकऱ्यांनी सांगितले.

सिन्नर तालुक्यातील पूर्व भागात सांगवी येथेही शिवारात वादळी वाऱ्याने शेतकऱ्याच्या सौर ऊर्जा पॅनलच्या सौर प्लेटा दुपारी तीनच्या सुमारास उडाल्या. या घटनेत शेतकरी हिराबाई काळू घुमरे यांचे सुमारे दोन लाख रुपयांचे नुकसान झाले आहे. वाऱ्यामुळे सौर उर्जेच्या प्लेटा उडून गेल्या. त्यात काही प्लेटा शेतात तुटून पडल्या होत्या.

मंडलनिहाय पावसाची स्थिती

मंडल पाऊस (मिमी)

नवी बेज १०.८

देवळाली ८४.८

सातपूर १३.३

शिंदे २३.३

लखमापूर(दिंडोरी) ३

पाथर्डी १३.३

इगतपुरी २६.८

घोटी ३६.३

वाडी वऱ्हे १९.३

नांदगाव(इगतपुरी) ९.५

डुबेरे १५.३

सोनांबे १३.५

नांदूर ९.३

धोडांबे २६

पाटोदा ४.८

सावरगाव ३

जळगाव ४.८