Akola News : दुग्धव्यवसायाला शेतीचा दर्जा मिळाला असून, दुग्धविकास व पूरक व्यवसायांसाठी ‘नाबार्ड’तर्फे विविध योजना राबविण्यात येत आहेत. जिल्ह्यातील शेतकऱ्यांनी याचा लाभ घ्यावा, असे आवाहन शेतकरी सहकारी संस्थांचे प्रतिनिधी व शेतकऱ्यांना येथे आयोजित कार्यशाळेत करण्यात आले.
‘नाबार्ड’च्या वर्धापनदिनानिमित्त जिल्हा परिषद प्राथमिक शिक्षक सहकारी संस्थेच्या इमारतीत कार्यक्रमाचे आयोजन करण्यात आले होते. या वेळी जिल्हा उपनिबंधक डॉ. प्रवीण लोखंडे अध्यक्षस्थानी होते.
‘नाबार्ड’चे जिल्हा विकास व्यवस्थापक श्रीराम वाघमारे, जिल्हा अग्रणी बँकेचे व्यवस्थापक नयन सिन्हा, महाराष्ट्र ग्रामीण बँकेचे विभागीय व्यवस्थापक श्री. गटकळ, अकोला-वाशीम जिल्हा सहकारी बँकेचे श्री. पारधी, ग्रामीण स्वयंरोजगार प्रशिक्षण केंद्राचे संचालक विद्याशंकर, डॉ. स्वप्नील कुकडे, श्री. तेलगोटे आदी उपस्थित होते.
संगणकीकरणाच्या माध्यमातून जिल्ह्यातील सर्व संस्था ऑनलाइन प्रक्रियेच्या दिशेने जात आहेत. संस्थांच्या बळकटीकरणातून कृषी सहकाराचा विकास होत असल्याचे डॉ. लोखंडे यांनी सांगितले. श्री. वाघमारे यांनी १९८२ पासून ‘नाबार्ड’ने ग्रामीण आणि शेती विकासासाठी उचललेल्या महत्त्वपूर्ण पावलांची माहिती दिली. त्यांनी फार्मर क्लब, स्वयंसहायता समूह बँक लिंकेज, किसान क्रेडिट कार्ड, आरआयडीएफ, पीओडीएफ यांसारख्या योजनांवर प्रकाश टाकला.
सेवा सहकारी संस्थांच्या संगणकीकरणाच्या माध्यमातून त्यांचे कर्ज व्यवसायाबाहेरचे शेतीपूरक उद्योग विकसित करण्यासाठी ‘नाबार्ड’ काम करीत आहे. विशेषतः दुग्ध व्यवसाय, दुग्ध संकलन केंद्रे उभारण्याच्या संधींबाबतही त्यांनी माहिती दिली. अकोल्यातील व्याळा गावातील यशस्वी उपक्रमाचा उल्लेख करीत अनेक संस्था दुग्ध व्यवसायाच्या दिशेने वाटचाल करू शकतात असे ते म्हणाले.
ज्ञानेश्वर शेतकरी उत्पादक कंपनीचे श्री. गिऱ्हे, ग्रामपूत्र शेतकरी उत्पादक कंपनीचे श्री. ढोकणे आणि बाळादेवी शेतकरी उत्पादक कंपनीचे शशिकांत नकासकर, श्री. गटकळ, श्री. सिन्हा यांनीही मनोगत व्यक्त केले.
डॉ. स्वप्नील कुकडे यांनी विदर्भ मराठवाडा डेअरी डेव्हलपमेंट प्रोजेक्टअंतर्गत शेतकऱ्यांसाठी उभ्या असलेल्या संधीबद्दल सविस्तर माहिती दिली.
जनावरांची खरेदी, दुग्ध प्रक्रिया, अर्थसाहाय्य या बाबतीत मिळणाऱ्या लाभांविषयी माहिती देण्यात आली. जिल्हा सहकारी बँकेचे श्री. थोरात यांनी कर्जप्रक्रियेबाबत मार्गदर्शन केले. श्री. वाघमारे यांनी आभार मानले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.