Latur/Dharashiv News: बाजारात सोयाबीनचे भाव चार हजार सातशे ते चार हजार आठशेच्या दरम्यान स्थिर असतानाही शेतकऱ्यांना बाजारभाव वाढीची मोठी आशा आहे. बाजारभाव पाच हजार रुपये क्विंटलच्या पुढे सहा हजारांपर्यंत जाईल, अशी चर्चा होत असताना शेतकऱ्यांमध्ये हमीभावाने सोयाबीनच्या विक्रीसाठी चलबिचल सुरू आहे. यात मार्केटिंग फेडरेशनच्या केंद्रावर सोयाबीन विक्रीसाठी शेतकऱ्यांनी गर्दी केली तर बाजार समित्या व शेतकरी कंपन्यांच्या केंद्रांवरील खरेदी बारदाना नसल्याने खोळंबली आहे..अतिवृष्टीमुळे संकटात सापडलेल्या शेतकऱ्यांच्या सोयाबीनला हमीभाव देण्यासाठी राज्य सरकारने यंदा १५ नोव्हेंबरपासूनच सोयाबीनची खरेदी सुरू केली. यात मार्केटिंग फेडरेशनच्या वतीने लातूर जिल्ह्यात पंधरा तर धाराशिव जिल्ह्यात वीस केंद्रांना सुरुवात करण्यात आली. महाराष्ट्र राज्य पणन मंडळाच्या वतीने कृषी उत्पन्न बाजार समित्या व शेतकरी उत्पादक कंपन्यांना खरेदीची परवानगी देण्यात आली आहे. .MSP Procurement: सोयाबीन, मूग, उडदाच्या खरेदीसाठी सात हमीभाव केंद्रे.हमीभाव खरेदी केंद्रे सुरू होण्यापूर्वी बाजारात सोयाबीनच्या भावाने उसळी खाल्ली. आठ हजार ९५१ क्विंटलपर्यंत भावात वाढ झाली. त्यानंतर भाव कमी होऊन ते चार हजार सातशे ते चार हजार आठशेच्या दरम्यान स्थिरावले आहेत. हमीभाव केंद्रांवर १५ नोव्हेंबरपासून प्रत्यक्षात खरेदीला सुरुवात झाली तरी बाजारात भाव वाढ झाली नाही. या स्थितीत शेतकऱ्यांना मात्र, बाजारात भाव वाढण्याची आशा आहे. खरेदी भाव वाढणार की भाववाढीच्या नादाला न लागता सोयाबीनची हमीभावाने विक्री करायची, या द्विधा मनःस्थितीत शेतकरी सध्या आहेत. यामुळे काढणी व मळणी झाली तरी अजून बाजारात सोयाबीनची आवक वाढलेली नाही. मागील काही दिवसांपासून १७ ते २० हजार क्विंटलच्या दरम्यानच आवक आहे..काही भागांत शेतकऱ्यांनी बाजारभावाची आशा सोडून हमीभावाने सोयाबीनच्या विक्रीला प्राधान्य दिले आहे. यामुळे लातूर जिल्ह्यात सोयाबीनची हमीभावाने खरेदी दिवसेंदिवस वाढत आहे. मार्केटिंग फेडरेशनच्या पंधरा केंद्रांवर आतापर्यंत १८ हजार २१५ क्विंटल खरेदी झाली आहे. यातील एक हजार ८५८ शेतकऱ्यांना ९८ लाख ९९ हजार ४२४ रुपये पेमेंट झाले आहे. हमीभावाने विक्रीसाठी २८ हजार ६९० शेतकऱ्यांनी नोंदणी केली असून त्यापैकी तीन हजार ४१४ शेतकऱ्यांना मेसेज पाठवले. त्यापैकी ८३१ शेतकऱ्यांच्या सोयाबीनची खरेदी झाली. फेडरेशनकडे जुना बारदाना शिल्लक असल्याने त्याची अडचण नाही. शेतकऱ्यांकडून सध्या चांगला प्रतिसाद मिळत असल्याचे जिल्हा मार्केटिंग अधिकारी नंदकुमार खोडसे यांनी सांगितले..Soybean Price: जाणून घ्या; आजचे सोयाबीन, कापूस, मका, हिरवी मिरची आणि डाळिंबाचे बाजारभाव.बारदानाअभावी पणनची खरेदी थांबलीगेल्या वर्षी मार्केटिंग फेडरेशनकडूनच बाजार समित्या व कृषी उत्पादक शेतकरी कंपन्यांना सोयाबीनच्या खरेदी केंद्रासाठी परवानगी व बारदाना देण्यात आला होता. या वर्षी महाराष्ट्र राज्य कृषी पणन मंडळांकडे ही जबाबदारी देण्यात आली आहे. मंडळाने खरेदी केंद्रांना मंजुरी दिली, परंतु अद्याप बारदाना दिला नाही. यामुळे १५ नोव्हेंबरपासून खरेदीला सुरुवात होऊनही बाजार समित्या व शेतकरी कंपन्यांकडील सोयाबीनची खरेदी खोळंबली आहे..या केंद्रांवर सोयाबीन विक्रीसाठी अनेक शेतकऱ्यांनी नोंदणी केली आहे. दहा दिवस झाले तरी बारदाना उपलब्ध होत नसल्याने शेतकरी व केंद्र संचालकांची चांगलीच गोची झाली आहे. याबाबत पणन मंडळाचे लातूरचे उरव्यवस्थापक महादेव बरडे व विभागीय कार्यालयातील अवधूत तांबे यांच्याशी संपर्क करण्याचा प्रयत्न केला असता तांबे यांनी मोबाइल उचलला नाही तर बरडे यांचा मोबाइल नेटवर्क क्षेत्राच्या बाहेर होता..धाराशिवला फेडरेशनच्या १७ केंद्रांवर खरेदीजिल्ह्यात मार्केटिंग फेडरेशनची वीस खरेदी केंद्र असून या केंद्रावर सोयाबीन विक्रीसाठी जिल्ह्यातील १५ हजार ७६८ शेतकऱ्यांनी नोंदणी केली आहे. त्यापैकी दोन हजार १८३ शेतकऱ्यांना सोयाबीन विक्रीसाठी मेसेज पाठवले असून यातील १७ केंद्रावर ७०७ शेतकऱ्यांच्या १४ हजार ९९० क्विंटल सोयाबीनची खरेदी करण्यात आली. तीन केंद्रांवर अद्याप खरेदी सुरू झाली नाही. यंदा खरेदी उशिराने सुरू झाल्यामुळे अद्याप एकाही शेतकऱ्याचे पेमेंट झाले नाही. या पुढील काळात खरेदीला आणखी वेग येऊन सोयाबीनचे पैसे तातडीने शेतकऱ्यांच्या खात्यावर जमा करण्यात येतील, अशी माहिती जिल्हा मार्केटिंग अधिकारी मनोज वाजपयी यांनी व्यक्त केली..ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
