Crop Damage तेलंगणा आणि आंध्रात पावसाचा कहर ; मराठवाड्यात लाखो हेक्टरवरील पिके जमिनदोस्त

Pune News : गेल्या काही दिवसांत महाराष्ट्रातील मराठवाड्यासह आंध्र प्रदेश आणि तेलंगणामध्ये पावसाने अक्षरश: थैमान घातले आहे. आंध्र आणि तेलंगणा या दोन राज्यात पावसानंतर आलेल्या पुरामुळे मोठ्या प्रमाणात नुकसान झाले आहे. या दोन्ही राज्यांत प्राथमिक आकडेवारीनुसार, चार लाख हेक्टरवरील पिकांचे नुकसान झाले आहे.

मराठवाड्यात लाखो हेक्टर क्षेत्र बाधित

सप्टेंबरच्या पहिल्याच आठवड्यात मराठवाड्यात झालेल्या पावसामुळे परभणी, नांदेड, बीड आणि हिंगोली या जिल्ह्यांमध्ये शेतीपिकांचे मोठ्या प्रमाणात नुकसान झाले आहे. पावसामुळे मराठवाड्यात ११.७७ लाख हेक्टरवरील शेतीपिकांचे नुकसान झाले आहे.

यामध्ये नांदेड जिल्ह्याला पावसाचा मोठ्या प्रमाणात फटका बसला असून तीन लाख हेक्टरचे नुकसान झाले आहे. तर परभणी जिल्ह्यात २.८६ लाख हेक्टर आणि हिंगोली जिल्ह्यातील २.५८ लाख हेक्टरवरील पिके बाधित झाली आहे. याशिवाय जालना जिल्ह्यात नुकसानाचा आकडा १.७९ लाख हेक्टरवर पोहोचला आहे.

आंध्रात २ लाख शेतकरी बाधित

मुसळधार पावसामुळे आंध्र प्रदेशमध्ये आलेल्या पुरामुळे शेतीचे मोठे नुकसान झाले आहे. पाऊस आणि पुरामुळे शेतीपिकांच्या झालेल्या नुकसानामुळे येथील शेतकरी हवालदिल झाले आहेत. आंध्र प्रदेशात मुसळधार पावसानंतर आलेल्या आपत्तीमुळे २० जिल्ह्यातील २ लाख शेतकरी बाधित झाले आहेत. तर, १.६९ लाख हेक्टरवरील पिकांचे नुकसान झाले असून १९ हजार हेक्टरवरील भाजीपाला पिकांचे नुकसान झाले आहे.

रायथू संगमकडून भरपाईची मागणी

दुसरूकडे तेलंगणा राज्यातही पावसामुळे दोन लाख हेक्टर शेतीला फटका बसला आहे. पावसामुळे खरीपातील कापूस आणि हरभरा पिकांचे मोठ्या प्रमाणात नुकसान झाले आहे. रायथू संगम संघटनेने अन्न पिकांच्या नुकसानापोटी प्रति एकर २५ हजार रुपये तर व्यवसायिक पिकांसाठी ५० हजार रुपये प्रति एकर भरपाईची मागणी सरकारकडे केली आहे. दरम्यान, तातडीची तेलंगणाच्या मुख्यमंत्र्यानी नुकसान भरपाईपोटी १० हजार रुपये एकरी मदत जाहीर केली आहे.