Crop Damage : संततधार पावसाने कोवळी पिके धोक्यात

Kille Dharur : किल्लेधारूर तालुक्यात आठ ते दहा दिवसांपासून संततधार पाऊस सुरू आहे. शेतपिकांना याचा मोठा फटका बसत आहे. सततच्या पावसाने सोयाबीन, उडीद, मूग, तूर पिवळे पडत आहेत. कापसावर मर रोगाचा प्रादुर्भाव झाला असून हंगाम धोक्यात आला आहे.

यंदा मृग नक्षत्रात समाधानकारक पाऊस झाल्यामुळे जूनच्या दुसऱ्या आठवड्यात पेरणी झाली. तसेच वातावरणदेखील पोषक असल्याने खरीप पिके जोमात आली आहेत. मात्र, आठ-दहा दिवसांपासून बीड जिल्ह्यासह धारूर तालुक्यात संततधार पाऊस सुरू आहे.

शेतात पाणी साचून राहत असल्यामुळे खरीप पिके सोयाबीन, मूग, उडीद, तूर पिवळे पडत आहेत. ढगाळ वातावरण असल्याने किडीचादेखील प्रादुर्भाव मोठ्या प्रमाणात वाढला आहे.

संततधार सुरू असल्याने फवारणीदेखील करता येत नाही. यावर्षी योग्यवेळी पाऊस पडल्याने धारूर तालुक्यात पेरणी योग्य क्षेत्रापैकी ५० टक्के क्षेत्रावर कपाशी लागवड केली आहे.

संततधार पावसामुळे कपाशीवर मर रोगाचा प्रादुर्भाव झाला आहे. त्यामुळे तत्काळ पंचनामे करून शासनाने अनुदान जाहीर करावे, अशी मागणी होत आहे.