Crop Insurance : पीकविमा परताव्यासह नुकसान भरपाईही रखडली

Nanded News : खरीप हंगाम २०२४ मध्ये अतिवृष्टीमुळे पिकांच्या नुकसानीबाबत जिल्हाधिकाऱ्यांनी जाहीर केलेला २५ टक्के अग्रिम विमा परतावा, नुकसानीबाबत दावे दाखल केलेल्या विमाधारकांसह बाधितांना शासनाने मंजूर केलेली ८१२ कोटींची भरपाई अद्याप शेतकऱ्यांना मिळाली नाही. विमा कंपनीकडे केंद्राचा विमा हप्ता रखडला आहे.

नांदेड जिल्ह्यात खरीप हंगाम २०२४ मध्ये झालेल्या अतिवृष्टीमुळे खरिपातील पिकांचे मोठ्या प्रमाणात नुकसान झाले होते. याचा फटका सात लाख शेतकऱ्यांना बसला होता. यात शेतकऱ्यांच्या पिकांचे पन्नास टक्क्यांपेक्षा अधिक प्रमाणात नुकसान झाले होते.

यामुळे जिल्हाधिकारी अभिजित राऊत यांनी नुकसानग्रस्तांना भरपाई मिळावी, यासाठी २५ टक्के अग्रिम विमा परतावा मिळावा, यासाठी अधिसूचना लागू केली. तर विभा भरलेल्या नुकसानग्रस्तांनी पन्नास टक्क्यांपेक्षा अधिक दावे दाखल केल्यामुळे विमा कंपनीने सॅम्पल सर्वेच्या आधारे परतावा देण्याचे धोरण लागू केले.

दरम्यान शेतकऱ्यांना दोन्ही घटकातर्गत परतावा मिळेल, असे सांगितले जात आहे. परंतु यासाठी केंद्र शासनाचा विमा हप्ता मिळाला नसल्यामुळे विमा परतावा रखडल्याचे बोलले जात आहे. खरीप हंगामात जिल्ह्यातील अकरा लाख २४ हजार शेतकऱ्यांनी विमा भरला होता.

या शेतकऱ्यांनी एक रुपये प्रमाणे ११ लाख २४ हजार विमा हप्ता भरला तर राज्य शासनाचा ३९५ कोटी व केंद्र सरकारचा ३०३ कोटी असा एकूण ६९९ कोटी रुपये विमा हप्ता कंपनीकडे जमा होणार आहे.

यातील राज्य शासनाने पहिला हप्ता कंपनीकडे जमा केला. परंतु केंद्र सरकारने हप्त्याचे पैसे दिले नसल्यामुळे शेतकऱ्यांना विमा परतावा मिळत नसल्याचे सूत्राने सांगितले. यासोबतच जिल्ह्यात अतिवृष्टीमुळे नुकसान झालेल्या सात लाख ८३ हजार शेतकऱ्यांना भरपाईसाठी जिल्हा प्रशासनाने ८१२ कोटींची मागणी राज्य शासनाकडे केली होती.

हा निधीही शासनाने मंजूर केला. यातील सहा कोटी भरपाई निधी शेतकऱ्यांच्या खात्यावर अपलोड करण्यात आला. यानंतर शेतकऱ्यांनी व्हीके नंबरद्वारे त्याचे सत्यापन (केवासी) देखील केले. परंतु अद्याप एकाही शेतकऱ्यांच्या खात्यावर भरपाईचा निधी मिळाला नाही. शासनाने निवडणुकीपूर्वी घोषित केलेल्या लाडकी बहिण योजनेमुळे सर्वच योजनेला कात्री लागल्याची माहिती संबंधित विभागाच्या सूत्रांनी दिली.