Wild Boar Rampage : रानडुकरांचा धुमाकूळ, पिकांचे नुकसान

Dahanu News : तालुक्याच्या किनारपट्टी भागातील गावांमध्ये शेतकऱ्यांनी बागायत क्षेत्रात भाजीपाला, रताळे, सुरणासारखी कंदमुळे, मिरची, ढोबळी मिरची, कोबी आदींची लागवड केली आहे. मात्र, या क्षेत्रात रानडुकरे धुमाकूळ घालून प्रचंड नुकसान करत आहेत. नेहमीच्या अशा प्रकारामुळे आता बागायती शेतकरी भाजीपाला उत्पादन घेणेच सोडून देत आहेत.

किनारपट्टी भागातील वाढवण, वासगाव, वरोर, बाडापोखरण, ओसारवाडी गावातील शेतकऱ्यांनी रब्बी हंगामात बागायती शेतीत रताळी, अळू, नवलकोल, मिरची, ढोबळी मिरची, कोबी आणि इतर प्रकारच्या भाजीपाल्यांची लागवड महागडी बियाणे, खते, रासायनिक औषधे आणि सोसायटीची तसेच बँकांकडून कर्ज घेऊन केली आहेत.

ही लागवड यावर्षी पाऊस लांबल्याने मागे पडली. मात्र, रात्रीच्या वेळी लागवड केलेल्या शेतात रानडुकरे धुमाकूळ घालून पिकांची नासाडी करत आहेत. मिरची, ढोबळी मिरची, कोबीसारख्या शेतीचे प्रचंड नुकसान करत आहेत.