Crop Damage : मुसळधारेने रात्रीतून होत्याचे नव्हते केले

Parbhani News : यंदा लई मन लावून शेती केली होती. कुणाचेही उसने, कर्जाऊ पैसे घेतले नाहीत. वाटलं यंदा सुगी चांगली होईल. चांगले दिवस येतील. पण नाल्याच्या पुरामुळे ऊस, सोयाबीन पिके हातची गेलीत. मातीचा सुपीक थर खरडून गेलेली जमीन पडीकच राहणार आहे. मुसळधार पावसाने एका रात्रीतून होत्याचे नव्हते केले. अशी व्यथा बोरगव्हाण (ता. पाथरी) येथील शेतकरी अशोक इंगळे यांनी मांडली.

परभणी जिल्ह्यातील पाथरी ते सेलू राष्ट्रीय महामार्गावरील पाथरी महसूल मंडलातील बोरगव्हाण हे प्रमुख ऊस उत्पादक गाव आहे. सोयाबीन, कपाशी, तूर आदींसह फुले, भाजीपाला पिकांची शेती केली जाते. शेतीपूरक दुग्ध व्यवसाय, शेळीपालन, रेशीम उद्योग आदी व्यवसायही अनेक शेतकरी करतात. सोमवारी (ता. २) सकाळी १० पर्यंतच्या २४ तासांमध्ये पाथरी मंडलात ३१४.५ मिलिमीटर पाऊस झाला. बोरगव्हाण शेजारील झरी येथील लघू सिंचन तलाव ‘ओव्हर फ्लो’ झाला.

सांडवण्यावरून मोठ्या प्रमाणात पाणी ओसंडल्यामुळे झरी तलाव नाल्याला मोठा पूर आला. नाला अरुंद असल्यामुळे धुरे- बांध फोडून पाण्याचा प्रवाह पिकांमध्ये पसरला. वेगाच्या प्रवाहामुळे अनेक शेतकऱ्यांच्या शेतातील सुपीक मातीचा थर वाहून गेला. खरडलेल्या ठिकाणी खडक उघडले पडले. मोठे खड्डे तयार झाले आहेत.

शेंगा भरण्याच्या अवस्थेतील सोयाबीन, बोंडे लागलेली कपाशी, ऊस, तूर, मूग, उडीद आदी पिकांचे अतोनात नुकसान झाले आहे. गोठ्यामध्ये पाणी शिरल्याने शेळ्या तसेच कोंबड्या वाहून गेल्या आहेत. तुषार संच, पाइप, ठिबक संच, शेती अवजारे, आखाड्यावरील पत्रे वाहून गेले. शिवारातून १ ते २ किलोमीटर वाहणाऱ्या झरी तलाव नाल्याच्या पुरामुळे सर्वाधिक नुकसान झाले आहे.

अशोक इंगळे म्हणाले, की आमची साडेसहा एकर जमीन आहे. आजवर कधी नाही परंतु खूप पाऊस पडला. शेतातील पुराच्या पाण्यात पिके बुडाल्याचे पाहिल्यानंतर चक्कर आली. उसाचे एकरी ७० टनांपर्यंत उत्पादन मिळाले असते. पिकांचे नुकसान पुढील हंगामात भरून काढता येईल. परंतु खरडून गेलेली जमीन सुपीक करणे लवकर शक्य नाही. सरकारने भरीव मदत करावी.

पूर ओसरल्यानंतर आखाड्यावर उडदाच्या शेंगा तोडत असलेले रामभाऊ इंगळे व रुख्मिणबाई इंगळे हे ज्येष्ठ शेतकरी दांपत्य म्हणाले, की पुराच्या पाण्यात बुडाल्यामुळे शेंगांतील उडदाला (सरक्या झाल्या) मोड फुटले आहेत. वळण फुटले. उसाच्या खोडवा सोयाबीनवर गाळ जमा झाला आहे.

कडबा वाहून गेला आहे. सरकारने बिघीन मदत करावी. प्रभाकर इंगळे यांचा नाल्याकाठी शेळ्यांचा मुक्तसंचार गोठा होता. त्याशेजारी कुक्कुटपालन होते. रात्री पुराचे पाणी गोठ्यात शिरले त्या वेळी त्यांचे वडील अडकून पडले होते. ग्रामस्थांनी त्यांची सुटका केली. परंतु शेळ्या व पिले मिळून ४६ शेळ्या, गावरान जातीच्या साडेचारशेवर कोंबड्या, अडीचशेवर अंडी, कुक्कुटखाद्य, खताच्या १० पिशव्या, पाइप तसेच अन्य साहित्य वाहून गेले.