Farmer Protest : समृद्धी महामार्गावर आंदोलन करणाऱ्या शेतकऱ्यांवर गुन्हा

Nashik News : निळवंडे धरणाच्या आवर्तनाचे पाणी सिन्नर तालुक्यातील लाभक्षेत्रातील गावांना नदी मार्गाने मिळावे, या मागणीसाठी मुंबई-नागपूर समृद्धी महामार्गावर शनिवारी (ता. ९) रास्ता रोको आंदोलन करणाऱ्या सुमारे १०० आंदोलक शेतकऱ्यांविरोधात वावी पोलीस ठाण्यात गुन्हा दाखल करण्यात आला.

समृद्धी महामार्गावर निळवंडे आवर्तनाचे पाणी सिन्नर तालुक्यातील लाभक्षेत्रात येणाऱ्या मलढोन, सायाळे, पाथरे खुर्द व बुद्रुक, वारेगाव या गावांसाठी, संगमनेर तालुक्यातील देवकवठे, कोपरगाव तालुक्यातील बहादरपूर या गावांसाठी पुन्हा सोडावे या मागणीसाठी शेतकऱ्यांनी रास्ता रोको आंदोलन केले होते.

मुंबईकडे जाणारी वाहतूक सुमारे तासभर शेतकऱ्यांनी रोखून धरली होती.पोलीस निरीक्षक चेतन लोखंडे यांच्या मार्गदर्शनाखाली उपनिरीक्षक पारस वाघमोडे याप्रकरणी तपास करीत आहेत.