Maharashtra Assembly Election Counting : आज मतमोजणी; ८ वाजता सुरुवात

Mumbai News : राज्यातील २८८ विधानसभा मतदारसंघ आणि नांदेड लोकसभा मतदारसंघासाठी १ अशी २८९ मतमोजणी केंद्रांवर आज (ता. २३) मतमोजणी होणार आहे. सकाळी आठ वाजता मतमोजणीला प्रारंभ होणार आहे. यासाठी प्रशासनाने जय्यत तयारी केली असून, मोठा पोलिस फौजफाटा तैनात केला आहे.

सकाळी ८ वाजता सर्व मतमोजणी केंद्रांवर मतमोजणी सुरू होईल. या प्रक्रियेदरम्यान, पोस्टल मतपत्रिकांची मतमोजणी सकाळी ८ वाजता सुरू होईल, त्यानंतर ईव्हीएमवरील मतांची मोजणी सकाळी साडेआठला होणार आहे.

निरीक्षक व उपस्थित उमेदवार किंवा त्यांचे प्रतिनिधी यांच्यासमोर सीलबंद स्ट्राँग रूम उघडण्यात येतील व ईव्हीएम मतमोजणी केंद्रावर नेण्यात येतील. मतमोजणी केंद्रातील सर्व कार्यवाही सी.सी.टीव्हीद्वारे चित्रित केली जाईल. तीनस्तरीय सुरक्षा व्यवस्था निवडणूक आयोगाच्या मार्गदर्शक सूचनांनुसार लागू करण्यात आली आहे.

सर्व विधानसभा मतदारसंघांमध्ये टपाल मतपत्रिकांची संख्या जास्त आहे. ३६ हजारांहून अधिक अत्यावश्यक सेवा मतदारांनी पोस्टल मतपत्रिकांद्वारे मतदान केले आहे. तर ८५ वर्षे वयाच्या ६८ हून अधिक ज्येष्ठ नागरिक आणि १२ हजारांपेक्षा अधिक दिव्यांग व्यक्तींनी गृह मतदान केले. त्यामुळे २८८ मतमोजणी केंद्रांवर १७३२ टेबल टपाल मतपत्रिकांच्या मतमोजणीसाठी आणि ५९२ टेबल्स ईटीपीबीएमएस स्कॅनिंगसाठी (पूर्व-मोजणीसाठी) उभारण्यात आले आहेत.