Soybean Crop Subsidy : सांगलीतील ३१ हजार सोयाबीन, कापूस उत्पादक शेतकऱ्यांना मिळणार ५ हजारांचे अनुदान

Sangli Agriculture News : खरीप हंगामात २०२३ मध्ये कापूस व सोयाबीन पीक लागवड करून त्याची ई-पीक पाहणी ऑनलाईन केलेल्या शेतकऱ्यांना शासनाने अर्थसाहाय्य योजनेतून प्रति हेक्टरी ५ हजार रूपये दोन हेक्टरच्या मर्यादीत अनुदान देण्याचा निर्णय घेतला. या अनुदानाचे वाटप टप्याटप्यात देण्यात येणार आहे.

सांगली जिल्ह्यातील या योजनेतून ६ कोटी १७ लाख रुपयांची आर्थिक मदत त्यांच्या खात्यावर जमा झाली आहे. ३१ हजार शेतकऱ्यांना याचा लाभ मिळाल्याची माहिती जिल्हा कृषी अधीक्षक विवेक कुंभार यांनी दिली.

सांगली जिल्ह्याचे जिल्हा कृषी अधीक्षक विवेक कुंभार म्हणाले की, एक हेक्टर कापूस आणि सोयाबीन पिकाला प्रत्येकी पाच हजार असे अनुदान निश्चित करण्यात आले. अर्थसाहाय्य योजनेत शेतकऱ्यांना लाभ देण्यासाठी ११ ऑगस्टपासून प्रत्येक गावात कृषी सहायकांनी योजनेची यादी लावली आहे.

जिल्ह्यातील सोयाबीन व कापूस उत्पादकांना झालेल्या नुकसानीसाठी आर्थिक मदत म्हणून कृषी विभागाद्वारे ०.२ हेक्टरहून कमी क्षेत्रासाठी सरसकट एक हजार व त्याहून अधिक क्षेत्रासाठी (दोन हेक्टरच्या मर्यादित) पाच हजार रुपये मदत पात्र उत्पादकांच्या खात्यात जमा केली आहे. हा पहिला टप्पा आहे. संमतीपत्र येईल तसे राहिलेल्या शेतकऱ्यांचे अनुदान खात्यावर जमा केले जाईल अशी माहिती कुंभार यांनी दिली.

सोयाबीन व कापूस पिकास एका हेक्टरपर्यंत पाच हजार रुपयांचे अर्थसाहाय्य मिळणार, अशी घोषणा यापूर्वीच सरकारने केली होती. हेक्टरी पाच हजार रुपये मदत देण्याचा निर्णय झाला होता. शेतकऱ्यांसाठी याद्या गावात लावण्यात आल्या होत्या. शेतकऱ्यांनी केवळ आधार कार्डची झेरॉक्स देऊन गावातील कृषी सहायकांकडे फॉर्मवर नाव व स्वाक्षरी करून दिल्याने पैसे जमा होण्यास सुरूवात होत आहे.

कुठलाही खर्च नाही

कापूस व सोयाबीन उत्पादक शेतकऱ्यांना अर्थसाहाय्य योजनेचा लाभ देण्यासाठी शेतकऱ्यांचा कोणताही वेगळा खर्च होणार नाही, याची दक्षता शासनाने या योजनेत घेतली होती. गावात लावलेल्या यादीत नाव असल्यास केवळ आधार कार्डची झेरॉक्स व शासनाने निर्धारित केलेले प्रतिज्ञापत्र शेतकऱ्यांनी भरून कृषी सहायकांकडे देण्याचे आवाहन करण्यात आले होते.