Cotton Crop Damage : कापसाच्या वाती, माती मिश्रित कापसाला फुटले कोंब

Chhatrapati Sambhajinagar News : कायगाव, अगरवाडगाव (ता. गंगापूर) येथे अतिवृष्टीने कपाशी पिकाचे मोठे नुकसान झाले. उरल्यासुरल्या कपाशीच्या कैऱ्या सडून जात असून काही ठिकाणी वेचणीस आलेल्या कपाशीच्या वाती होऊन त्यांना अंकुर फुटले आहे. यंदा उत्पादन घटणार असल्याने शेतकरी मोठ्या आर्थिक संकटात सापडला आहे.

यंदा मॉन्सूनोत्तर पावसाच्या फटक्याने शेतीपिके उद्ध्वस्त झाली असून शेतकरी पुरता हताश झाला आहे.शेतीला केलेला खर्च निघत नसल्याने शेतकरी मोठ्या आर्थिक संकटात सापडला आहे. जामगाव आणि भेंडाळा महसूल मंडळात दिवाळीच्या सणामुळे वेचणी अभावी झाडाला राहिलेला कापूस भिजला आहे. तर नवीन लागवड झालेला ऊस, पेरणी झालेला हरभरा, गहू या पिकांची दाणादाण झाली आहे.

अनेक शेतात मॉन्सूनोत्तर पावसाचे पाणी तुंबल्याने शेत जलमय झाले आहे. कायगाव, अमळनेर, लखमापूर, भिवधानोरा, गळनिंब, अगरवाडगाव, धनगरपट्टी आदी भागात रविवारी (ता. २६) नोव्हेंबर २०२३ ते शनिवारी (ता. २) डिसेंबर २०२३ पर्यंत झालेल्या पावसाने पीक नुकसानीचे प्रमाण अधिक आहेत.

हातातोंडाशी आलेल्या हुरडा ज्वारी, फळपीक, कांदा रोप, कापूस सर्वच पिकांची नासाडी केली आहे. त्यामुळे उरल्या शिरल्या पिकांच्या स्वप्नांवर पाणी फिरले आहे. अनेक ठिकाणी ऊस लागवड केलेल्या शेतात पाणी साचले आहेत तर साखर कारखान्याला ऊस तोडणी अवस्थेत असलेला उभा पीक आडवा पडला आहे.

तूर, ज्वारी पीक भुईसपाट झाले आहे. आतून कपाशीचे बी फुगून कोंब आले आहे. तर अनेक ठिकाणी कपाशीची सरकी हलकी झाल्याने वजन घटले. परिणामी उत्पादनावर मोठा परिणाम झाला आहे. डोळ्यांसमोर नुकसान पाहून शेतकरी हताश झाला आहे.