Nano DAP: नॅनो डीएपीमुळे एक पोत्याचं खत एका बाटलीत मिळणार

Nano DAP Update : देशातील शेतकऱ्यांना आता त्यांना डीएपी खताच्या (DAP Fertilizers )  पोत्यांचं ओझं पाठीवर घेऊन जावं लागणार नाही. कारण आता कोरोमंडल इंटरनॅशनल लिमिटेड या कंपनीने शनिवारी 'नॅनो डीएपी', (Nano DAP) नॅनो तंत्रज्ञानावर आधारित खत बाजारात आणले आहे. हे खत एक लिटरच्या बाटल्यांमध्ये उपलब्ध असेल.

नॅनो डीएपीचे खत आयआयटी बॉम्बे येथील संशोधन आणि विकास केंद्राने विकसित केले आहे. कोरोमंडल कंपनी नॅनो डीएपी खतांचे उत्पादन वाढीसाठी सुविधा तयार करत आहे. आंध्र प्रदेशमध्ये चार कोटी बाटल्या निर्मिती करण्याची क्षमता असलेला कारखाना उभारण्यात येत आहे. नॅनो डीएपी उत्पादन 2023 अखेरपर्यंत सुरू होणार आहे.

कोरोमंडल कंपनीच्यावतीने निवेदनात सांगण्यात आले आहे की, नॅनो डीएपी खतासाठी सुमारे ७०० क्षेत्रीय चाचण्या घेतल्या आहेत. तसेच उत्पादनाच्या गुणवत्तेसाठी काही कृषी विद्यापीठांशी भागीदारी करण्यात आली आहे. नॅनो डीएपी प्रकल्पाला खत विभागाकडून नियामक मंजुरी मिळाली आहे.

केंद्रीय रसायने आणि पेट्रोकेमिकल्स विभागाचे सचिव अरुण बरोका म्हणाले की, नॅनो डीएपी हे खतामध्ये आत्मनिर्भर होण्याच्या दिशेने एक महत्त्वपूर्ण पाऊल उचलले आहे. नॅनो डीएपी उद्योगाच्या वापराला प्रोत्साहन देण्यासाठी आणि पारंपारिक पोषक घटकांना पर्यायी खत उपलब्ध करून देण्यासाठी काम करत आहोत. नॅनो डीएपीचा वापर वाढल्यास जमिनीला पोषण द्रव्याचा योग्य पुरवठा, खतांचा अपव्यय कमी आणि पाण्याचे संरक्षण करून शाश्वत शेती पद्धतींना प्रोत्साहन दिले जाईल

गेल्या महिन्यात भारत सरकारने नॅनो डीएपीलाही मंजूरी दिली, अशी माहिती केंद्रीय रसायन मंत्री डॉ मनसुख मंडाविया यांनी दिली होती. 'नॅनो डीएपीची एक बाटली डीएपीच्या एका पोत्याइतकी परिणामाकरक असेल.  यापूर्वी पारंपारिक युरियाला पर्याय म्हणून जून २०२१मध्ये नॅनो युरिया बाजारात आला आहे. ही भारतीय शेती आणि अर्थव्यवस्थेला चालना देणारी घटना आहे.