Farmer Loan Waiver : 'पंतप्रधानांशिवाय देवा भाऊचं पानही हालत नाही...'; कॉंग्रेस खासदाराने संसदेत केली कर्जमाफीची मागणी

Farmer Karjmafi : संसदेच्या पावसाळी अधिवेशनात कॉंग्रेसचे खासदार बळवंत वानखेडे यांनी बुधवारी (ता.३०) शेतकरी कर्जमाफीचा मुद्दा उपस्थित केला. राज्यातील शेतकरी कर्जमाफीची मागणी करत आहेत. राज्य सरकारने शेतकऱ्यांना कर्जमाफीचं आश्वासन दिलं आहे, पण मुख्यमंत्री फडणवीस कर्जमाफी पाऊल उचलत नाहीत, असे खासदार वानखेडे लोकसभेत बोलताना म्हणाले.

"नापिकी आणि कर्जामुळे शेतकरी आत्महत्याचा आकडा दिवसेंदिवस वाढत आहे. तो फार चिंताजनक आहे. महाराष्ट्रातील सरकारने शेतकऱ्यांना कर्जमाफीचं निवडणुकीपूर्वी आश्वासन दिलं. परंतु आजपर्यंत आमच्या देवा भाऊनं कर्जमाफीचा निणर्य घेतला नाही, फक्त कर्ज माफ करू एवढंच ते बोलतात." असे खासदार वानखेडे म्हणाले.

शेतकरी कर्जमाफीसाठी राज्य सरकारला पंतप्रधानांनी आदेश द्यावेत, अशी विनंती सभागृहात वानखेडे यांनी केली. "पंतप्रधानांचं महाराष्ट्र सरकार पूर्णत: ऐकतं. देवा भाऊचं पंतप्रधानांशिवाय पानही हालत नाही. म्हणून माझी पंतप्रधानांना विनंती आहे की, त्यांनी महाराष्ट्र सरकारला कर्जमाफीसाठी सक्त आदेश देऊन शेतकऱ्यांच्या पाठीशी उभं राहिलं पाहिजे."

महायुती सरकारने शेतकऱ्यांना विधानसभा निवडणुकीपूर्वी कर्जमाफीचं आश्वासन दिलं आहे. त्यामुळे शेतकऱ्यांना कर्जमाफीची अपेक्षा आहे. परंतु राज्य सरकार ठोस निणर्य घ्यायला तयार नाही. नुकत्याच झालेल्या विधिमंडळाच्या पावसाळी अधिवेशनात विरोधकांनी कर्जमाफीचा मुद्दा लावून धरला. मात्र राज्य सरकारने शेतकऱ्यांना कर्जाच्या विळाख्यातून बाहेर काढण्यासाठी एक समिती स्थापन केली. त्यामुळे राज्य सरकार कर्जमाफीला टाळत असल्याची चर्चा सुरु झाली आहे.

दरम्यान, राज्यात मागील चार वर्षांपासून अस्मानी आणि सुल्तानी संकटाने शेतकरी जेरीस आले आहेत. सरकारच्या धोरणामुळे प्रमुख् शेतमालाला हमीभावापेक्षा कमी भाव मिळत आहे. तर दुसरीकडे अवकाळी, गारपीट, अतिवृष्टीमुळे शेतकऱ्यांच्या शेती पिकांचं अतोनात नुकसान होत आहे. त्यामुळे शेतकऱ्यांचं उत्पादन घटलं आहे. परिणामी शेतकरी कर्जमाफी करून शेतकऱ्यांना दिलासा द्यावी अशी मागणी शेतकरी करत आहेत.