Cotton Purchase : ‘सीसीआय’च्या बार्शीटाकळी केंद्रावर कापूस खरेदीस प्रारंभ

Akola News : बार्शीटाकळी येथील जे. एस. कॉटन इन्डस्ट्रीज येथे नुकताच सीसीआयच्या कापूस खरेदीचा शुभारंभ झाला. जिल्ह्यात बार्शीटाकळीसह १० केंद्रांवरून यंदा खरेदी होणार आहे. पुढील आठवड्यात या खरेदीला वेग येणार आहे. यंदा कापसाला ७५२१ रुपयांचा हमीभाव आहे.

कापूस शुभारंभप्रसंगी भारतीय कापूस निगमचे महाराष्ट्र चेअरमन व व्यवस्थापकीय संचालक ललितकुमार गुप्ता यांनी फीत कापून रीतसर उद्घाटन केले. यावेळी सीसीआयचे मुख्य प्रबंधक निरजकुमार (अकोला), सहाय्यक प्रबंधक प्रवीणकुमार, केंद्र प्रमुख अभय प्रतापसिंह, पारसचे अंकुश देशमुख, जे.एस.कॉटन इंडस्ट्रीजचे सुबोध गोयनका, जय गोयनका, दयावान कॉटन इंडस्ट्रिजचे संचालक अहमद खान,

कृषी उत्पन्न बाजार समितीचे सचिव सतीश शेळके यांची उपस्थिती होती. महागाव येथील सचिन पोरे, ज्ञानेश्‍वर ढोरे यांचा कापूस विक्रीकरिता आला होता. यानिमित्ताने त्यांचा शाल व श्रीफळ देऊन सत्कार करण्यात आला. यावेळी परिसरातील शेतकरी उपस्थित होते.

शासकीय कापूस खरेदी सुरू झालेली आहे. कृषी उत्पन्न बाजार समितीकडे कापूस उत्पादक शेतकऱ्यांनी नोंदणी करावी. नोंदणी करताना मोबाईल नंबर जोडलेले आधार कार्ड, सातबारा आणावा, असे आवाहन बाजार समितीचे सचिव सतीश पाटील यांनी केले.